Құрылыс басқармасы тапсырысты орындаған ЖШС-пен соттасып жатыр.
ERNUR.KZ. Ақтөбе құрылыс басқармасы 24 пәтерлік екі тұрғын үйдің құрылысына тапсырыс берген. Оны орындау үшін «Машат» ЖШС-мен келісімшарт жасап, бюджеттен 337 миллион теңге бөлген. Алайда, құрылыс аяқталғаннан кейін үйлердің іргетасында әр түрлі жарық пайда болып, жарамсыз болып қалды, деп жазады azattyq-ruhy.kz.
Басқарма тапсырысты 2018 жылы берген, бір жылдан кейін тұрғын үй құрылысы аяқталып, пайдалануға берілген. Тұрғын үйлердің құрылысы кейіннен қосалқы мердігер «Агро-Сервис» ЖШС-не берілген.
«Қылмыстық кодекстің 190-бабының 4-бөлігінің 2-тармағы, 278-бабының 2-бөлігі және 280-бабының 1-бөлігімен (алаяқтық, сапасыз салынған құрылыс және сараптамалық жұмыстарды немесе инжинирингтiк қызметтер көрсетуді тиісінше орындамау) сотқа дейінгі тергеп-тексеру аяқталды.
Мамандардың қорытындысына сәйкес, үйлер апатты жағдайда, пайдалануға жарамсыз және бұзуға ұсынылған. Іргетас бетон блоктарының техникалық сипаттамалары ГОСТ талаптарына сәйкес келмейді. Жиналған дәлелдемелердің негізінде күдіктілерге қатысты «үйқамақ», сондай-ақ «кепіл» түріндегі бұлтартпау шаралары таңдалды», - деп хабарлады прокуратура.
Қазіргі уақытта облыс прокуратурасымен төрт күдіктіге қатысты қылмыстық іс мәні бойынша қарау үшін, Ақтөбе қаласының №2 сотына жолданды.
