Банктегі есепшотын біреуге берген адам жазаланады – ІІМ ескертеді

ERNUR.KZ. Ішкі істер министрлігі дербес деректерді қорғауға және қаржы қызметі саласындағы қауіпсіздікті арттыруға бағытталған Қазақстан Республикасының қылмыстық заңнамасындағы маңызды өзгерістер туралы ескертеді, деп жазады inbusiness.kz.

"Қылмыстық кодекстің жаңа 232-1 бабында өзінің банктік деректемелерін үшінші тұлғаларға бергені үшін, сондай-ақ материалдық сыйақы немесе мүліктік сипаттағы пайда үшін немесе оларды алу мақсатында үшінші тұлғаның мүддесі үшін я болмаса пайданы көздеп, төлемдер немесе ақша аударымдарын жүзеге асырғаны үшін қылмыстық жауаптылық енгізілді", – деп хабарлайды ҚР Ішкі істер министрлігі.

Алаяқтар берілген деректерді қылмыстық кірістерді қолма-қол ақшаға айналдыру немесе басқа азаматтарды алдау үшін пайдаланады. Көп жағдайда зардап шеккендер өздерінің қылмысқа қатысушы екенін түсінбей де қалады.

Есіңізде болсын: жеке және банктік деректер жай ғана ақпарат емес, бұл сіздің мүлкіңіздің, қауіпсіздігіңіздің және заң алдындағы жауапкершілігіңіздің кілті.

ІІМ ескертеді:

• ешқашан банктік деректеріңізді үшінші тұлғаларға бермеңіз;
• картаңызды немесе шотыңызды беру арқылы "оңай ақша табуға" келіспеңіз;
• күдік туындаған жағдайда банкке немесе құқық қорғау органдарына хабарласыңыз.