БҚО-да студент кісі өлтіргені үшін 15 жылға сотталды

ERNUR.KZ. БҚО-да 18 жастағы медициналық колледж студенті Назар Сапарғалиев кісі өлтіргені үшін 15 жылға сотталды. Үкім қылмыстық істер жөніндегі мамандандырылған ауданаралық сотында жарияланды, деп жазады nur.kz.

Қайғылы жағдай осы жылдың 13 сәуірінде Жәнібек ауданы, Қамысты ауылында болған.

Жас жігіт Қылмыстық кодекстің 99-бабы "Адам өлтіру" бойынша кінәлі деп танылып, 15 жылға бас бостандығынан айырылды. Үкімді судья Бақыт Ермаханов жариялады. Сонымен қатар, сот Назар Сапарғалиевті марқұмның әйеліне 10 миллион теңге көлемінде моральдық өтемақы төлеуге міндеттеді.

Іс материалдарына сәйкес, Назар Сапарғалиев пен оның досы Рақымғалиев ауылды аралап жүріп, екі егде жастағы ауылдастары Жұмабаев және Уәлиевпен кездеседі. Егде жастағы азаматтар сыра сатып алуды талап ете бастайды. Жас жігіттер бас тартқан кезде, сыныптастары оларды соққыға жығып, келесіде аяқтарын сындыратынын айтып, қорқытқан.

"Назар Сапарғалиев достарына болған жағдай туралы айтып, келесі күні оларды ертіп төбелеске шыққан. Ауылдың саябағында жаппай төбелес басталып, Назар Сапарғалиев ас үй пышағымен Қалжықовты жарақаттады, ол ауруханаға бара жатқан жолда қайтыс болды.

Сотталушы өз кінәсін мойындамады. Ол бар кінәні тек қысқа мерзімге сотталудан үмітті болғандықтан өз мойнына алғанын мәлімдеді. Алайда сот барысында куәгерлер Назар Сапарғалиевтің қолынан пышақ көргендерін айтқан. Сонымен қатар, төбелес кезінде тағы екі ер адам жарақат алды, олардың жарақаттары жеңіл болды", - дейді Бақыт Ермаханов.

Оқиғадан кейін Назар Сапарғалиев достарына қоңырау шалып, бір адамды өлтіргенін айтқан екен.

Марқұмның әйелі Әйгерім Қалжықова 30 миллион теңге көлемінде өтемақы талап етті. Алайда, сотталған адамның материалдық жағдайын ескере отырып, сот 10 миллион теңге көлемінде өтемақы тағайындаған. Марқұмның артында кәмелетке толмаған үш қызы қалды. Олардың кенжесі небәрі сегіз айда.

"Адам өмірі кез келген ақшадан қымбат. Бүтін бір отбасы асыраушысынан айырылды. Өкініштісі, Қалжықов бір күн бұрын Назарғалиевті ұрғандардың қатарында болмаған. Ол тек Жұмабаев және Уәлиевпен кездесуге келеді. Барлығы Қалжықовтың сабырлы, мейірімді және жауапкершілігі мол адам болғанын атап өтті", - деді судья.

Ал сотталушының анасы Ажар Сапарғалиева баласының мұндай ауыр қылмысқа барғанына сенбейтінін айтуда.