Бакалавриатқа бөлінетін гранттардың саны жыл сайын өзгеріп тұрады.
фото: пресс-служба корпоративного Фонда "Болашақ"
ERNUR.KZ. Ғылым және жоғары білім министрі Саясат Нұрбек "Болашақ" бағдарламасы аясында бакалаврға бөлінетін гранттардың санын жариялады, деп жазады sputnik.kz.
Бүгінде заңға өзгерістер енгізілді. Оған сәйкес, халықаралық сайыстардың жеңімпаздары "Болашақ" бағдарламасы аясында шетелде бакалавриат оқи алады. Бірақ биыл ондай мүмкіндік болмайды.
"Қазір заңға өзгерістер енгізілді. Биыл біз үлгермейміз. Оны егжей-тегжейлі қарастыруымыз қажет", - деді Нұрбек үкіметте өткен брифингте.
Ал бакалавриатқа бөлінетін гранттардың саны жыл сайын өзгеріп тұрады.
"Стипендияның саны жыл сайын өзгеруі мүмкін. Бірақ шамамен 10-20 гранттан аспайтын шығар. Неге десеңіз, қазір бәсеке өте жоғары. Халықаралық сайыстарға жеңіске жеткен балаларды шетелде бірден алып кетеді. Біз де оларды алып кетуге тырысуымыз қажет", - деді министр.
Айта кетері, қаңтарда сенат білім беру заңнамасына енгізілген өзгерістерді мақұлдады. Соның аясында халықаралық олимпиадалар мен ғылыми жобалардың жеңімпаздары "Болашақ" бағдарламасымен де тегін оқуға мүмкіндік алады.
