Депутат Жамбыл облысындағы су тапшылығына байланысты тергеу жүргізуді талап етті

Депутат Гүлдара Нұрымова биыл оңтүстік өңірдің шаруа қожалықтары судан тарыққанын еске салды. Салдарынан Жамбыл облысының 6 ауданында төтенше жағдай жарияланған.

"Қазсушар облыста қолданыстағы суармалы жерлерді ағын сумен қамтуды жақсарту үшін 2019 жылдан Халықаралық қаржы институттарының несиесі есебінен жалпы құны 40,0 млрд теңгені құрайтын 2 жоба жүзеге асырып бастаған. Бұл екі жоба 2021 жылы бітіп, жалпы 114 мың гектар алқапты сумен қамтуы керек еді. Алайда жобалау-сметалық құжаттаманың сапасыз әзірленуіне, жауапсыз мердігерлердің жұмысына және "Қазсушар" кәсіпорны тарапынан бақылаудың әлсіздігіне байланысты жобалардың аяқталуы биылғы желтоқсанға ауыстырылған. Жұмыстың уақытылы аяқталатыны үлкен күмән туғызады", - дейді Нұрымова премьер-министрдің бірінші орынбасары Роман Склярға жолдаған депутаттық сауалында.

Бұған қоса, оның айтуынша, атқарылған жұмыстардың сапасы сын көтермейді. Бүгінгі таңда жобалар аясында жоспардағы 54 мың гектардың тек 34 мың алқабы ғана ағын сумен қамтылған. Жауаптылардың салғырттығы салдарынан 20 мың гектарға жуық жерді иеленіп отырған шаруалар шығынға батып жатыр.

"Олардың шығынын өтеу бойынша үкіметтен бөлінетін қаржы әр зардап шеккен шаруаға әділ түрде жетуі керек. Бұл қалай қадағаланады? Ал шаруаларды сумен қамтуға қатысты сырттан алынған қарыздарды қалай және кім өтейді? Бұл мәселеге нақты кім жауапты?", - деп сұрады депутат.

Сондай-ақ Нұрымова ағын суды алу бойынша қырғыз билігімен жүргізілген келіссөздердің уақытылы жасалмағаны және нәтижесіз болуы су тапшылығын ушықтырып отырғанын атап өтті.

Ол мұндай өрескел кемшіліктердің болуы салаға жауапты тұлғалардың тиісті құқықтық жауапқа тартылмауының салдары деп санайды.