Канададағы қазақ қызының жобасын Google үздік деп таныды

ERNUR.KZ. Қазақстандық Әсел Беглинованың стартап жобасы Канададағы Google for Startups тарапынан үздік деп танылды, деп жазады azattyq-ruhy.kz.

«Қазақстандық Әсел Беглинова Канадада кәсіпкерлерге көмектесетін сервис ойлап тапты. Оның стартабы Канада мен Америка Құрама Штаттарындағы жүздеген компаниялар арасында топ жарып, үздік атанды», - деп жазды цифрлық даму, инновациялар және аэроғарыш өнеркәсібі министрі Бағдат Мусин.

Министр Google for Startups акселераторы Қазақстанда, атап айтқанда Astana Hub-та да бар екенін атап өтті.

«Оның құрылтайшылары Орталық Азияның барлық елдері, Моңғолия және Әзірбайжан арасында таңдау жасап, бізді өңірлік серіктес ретінде таңдағаны қуантарлық жағдай. Яғни, Astana Hub және Google for Startups ұсынған Silkway акселерациялық бағдарламасына Орталық Азия, Әзербайжан және Моңғолия елдерінен Product/market fit сатысында стартап-компаниялар қатыса алады», - деді ол.

Іріктеу нәтижелері бойынша 15 үздік жоба Нұр-Сұлтан қаласында өтетін және 3 айға созылатын акселерацияға тегін қатыса алады.