Полицейлер зардап шеккендердің бірі 59 жастағы үй иесі, екіншісі осы үйде жөндеу жұмыстарын жүргізген 72 жастағы құрылыс бригадирі екенін анықтады.
ERNUR.KZ. Қарағандыда екі адамды өлтірді деген күдікке ілінген 34 және 39 жастағы ер адамдар ұсталды, деп жазады sputnik.kz.
4 қараша күні сағат 11.30 шамасында Қарағандыда жеке тұрғын үйдің ауласынан пышақ жарақатын алған екі ер адамның мәйіті табылды.
Полицейлер зардап шеккендердің бірі 59 жастағы үй иесі, екіншісі осы үйде жөндеу жұмыстарын жүргізген 72 жастағы құрылыс бригадирі екенін анықтады. Куәгерлердің айтуынша, екі жұмысшы жәбірленушілерді пышақтап, көлікпен қашып кеткен.
"Құрықтау" жоспары жарияланды. Қаскүнемдер мінген көлік бірден облыстық полиция департаментінің бейнебақылау камераларына түсті. Жедел кезекші көлікті бақылап, барлық ақпаратты патрульдік полиция қызметкерлеріне жіберіп отырды", - деді Қарағанды облысы полиция департаментінің басшысы Ерлан Файзуллин.
Сауатты жүргізілген жедел іс-шаралардың нәтижесінде Теміртау қаласы полиция басқармасы патрульдік полиция батальонының қызметкерлері "Қарағанды-Теміртау" тас жолында ұрланған көліктің соңына түсті. Олар екі күдікті – 34 және 39 жастағы ер адамдар мінген көлікті ұстады.
Ұсталғандар кінәсін мойындады. Қылмыс құралы тәркіленді.
Қазақстан Қылмыстық кодексінің 99-бабының 2-бөлігі бойынша қылмыстық іс қозғалды. Тергеу жүргізіліп жатыр.
Полицейлер оқиғаның себептері мен мән-жайын анықтауға кірісті.
