"Қазақстан" шахтасындағы трагедия: сот үкімі шықты

2023 жылы 17 тамызда сол кездегі "АрселорМиттал Теміртау" компаниясына қарасты "Қазақстан"" шахтасында конвейерлік отқа оранды. Артынан көмір кені де өртенді. 5 кенші қаза тапты. Ал шахтадағы өртті ұзақ уақыт бойы өшіре алмады. Осы апат үшін төрт адам жауапқа тартылды. Олардың ішінде директор орынбасарының міндетін атқарушы, конвейерлік көлік учаскесінің бастығы және тағы екі маман бар. Олар абайсызда екi немесе одан да көп адамның өлiмiне әкеп соққан тау-кен немесе құрылыс жұмыстарын жүргiзудің қауiпсiздiк қағидаларын бұзғаны үшін айыпталды.

Сот материалына сәйкес, шахтада көмір конвейерін ұстап тұратын металл арка бекітпесі деформацияға ұшыраған. Оған қоса, орташа тұтанғыш конвейер таспасын пайдалануға рұқсат етілген: оны ұзақ уақыт бойы тазартпаған. Ал істен шыққан роликтерді ауыстыруға наряд берілмеген. Соның салдарынан өрт шыққан.

Прокурорлар апатқа жауапты тұлғаларды 4 жылға бас бостандығынан айыруды сұрады. Жәбірленушілер де заң бойынша жаза тағайындауды, ал қорғаушылар сотталушыларды ақтауды сұрады.

Қылмыстық кодекстің 277-бабы, 3-бөлігі бойынша абайсызда орташа ауырлықтағы қылмыс үшін 3 жылдан 8 жылға дейін бас бостандығынан айыру жазасы қарастырылған. Ал жеңiлдететiн мән-жайлар болған және ауырлататын мән-жайлар болмаған жағдайда жазаның мерзімі 4 жылдан аспауға тиіс. Заңның бұл талабы сот үшін міндетті болып саналады.

Сотталушылардың жас балалары бар. Бұл – жазаны жеңілдететін мән-жай. Жауапқа тартылғандар бұрын сотталмаған, жұмыс орны бойынша оң мінездеме алды. Прокурор ауырлататын мән-жайларды анықтаған жоқ. Судья осының бәрін ескере отырып, сотталушыларды 4 жылға бас бостандығынан айыруға шешім шығарды.

Сот үкімі заңды күшіне енген жоқ.

Айта кетері, дәл осы апаттан кейін "АрселорМиттал Теміртауға" қарасты Костенко атындағы шахтада жарылыс болды. Ол кезде 46 кенші қаза тапты. Президенттің тапсырмасымен "АрселорМиттал Теміртау" АҚ-сымен келісімшарт тоқтатылды. Allur компаниялар тобы жаңа инвестор болып келді. Ал кәсіпорынның атауы "Qarmet"-ке ауыстырылды.