Қазақстан трассаларында QR-кодпен жұмыс істейтін «ақылды» дәретханалар пайда болады

25.07.2025 12:14

156

Қазақстанда тасжол бойындағы санитарлық аймақтар жаңарып жатыр.

Фотоколлаж: Azattyq Rýhy/Әбілқасым Есентаев

ERNUR.KZ. Қазақстанда республикалық маңызы бар автожолдар бойындағы санитарлық тораптар ауқымды түрде жаңарып жатыр. Бұл туралы «ҚазАвтоЖол» Ұлттық компаниясы» АҚ басқарма төрағасы Дархан Иманашев мәлім етті, деп жазады azattyq-ruhy.kz.

Ел бойынша 888 жаңа дәретхана орнатылды

Дархан Иманашевтың айтуынша, қазіргі таңда еліміздегі трассалар бойында 744 жылу тартылмаған дәретхана (отын мен жылытусыз), 144 жылу тартылған дәретхана бар.

Жылу тартылған дәретхана мен ашық дәретханалардың айырмашылығы неде?

Іс жүзіндегі нормаларға сәйкес, ашық дәретханалар әр 25 шақырым сайын, жабық дәретханалар әр 50 шақырым сайын орнатылуы тиіс.

«Барлық жолдарды жылы санитарлық тораптармен толық қамту әзірге мүмкін емес. Себебі бюджет шектеулі және оларды күтіп ұстау қиын. Елімізде жылдың 9 айы суық. Біз жылы дәретханаларды байланыссыз жерлерге орната алмаймыз», – дейді Иманашев.

Жылы дәретханаларды күтіп ұстау – қымбат процесс

Мысалы, бір жылы дәретхананы күтіп ұстау айына шамамен 700 мың теңге тұрады. Бұл шығынның көп бөлігін шалғай арақашықтық құрайды:

«Мысалы, дәретхана базаға 200 шақырым қашықтықта орналасқан. Бригада барып, тазалап қайтқанша – бұл үлкен шығын. Ал олар екінші дәретханаға жеткенше, біріншісі қайта ластанады. Сондықтан мұндай нысандарды инфрақұрылымға жақын орналастыру тиімді», – деп түсіндірді спикер.

Әр дәретханаға QR-код пен жеке нөмір берілді

Енді әрбір дәретханаға жеке нөмір мен QR-код орнатылады. Пайдаланушылар QR-кодты сканерлеп, арнайы чат арқылы шағым қалдыра алады.

«Біз әр дәретхананың қайда орналасқанын және оны кімнің күтіп ұстайтынын білеміз. Егер ол жалға берілген болса, ал шағым орынды болса – жалға алушыға айыппұл салынады», – дейді «ҚазАвтоЖол» мамандары.