Қазақстанда АЭС-терге арналған уранның стратегиялық қоры құрылады

02.04.2025 09:12

161

Қазақстанда қуат көзіне деген сұраныс жыл сайын артып келеді.

Фото: Қайрат Зайнишев/Kazinform

ERNUR.KZ. Қазақстанда АЭС-терге арналған уранның стратегиялық қоры құрылады. Уран байытылмайды, яғни кен күйінде сақталады. Энергетика министрлігінің Kazinform сауалына жолдаған жауабында осындай мәлімет айтылған, деп жазады inform.kz.

- Қазақстан уран өндіру бойынша әлемде бірінші орында (40%) және оның жер қойнауында барлық барланған әлемдік қорлардың уран қорының 14%-ы шоғырланған. Сондай-ақ Қазақстанда дайын ядролық отын өндірісі бар. АЭС құрылысы Қазақстанға өзінің уран ресурсын ішкі энергиямен жабдықтау үшін пайдалануға мүмкіндік береді. Қазақстандағы АЭС-тер үшін уранның стратегиялық қорлары құрылады, - делінген ресми жауапта.

Еске салсақ, Президент Қасым-Жомарт Тоқаев Бурабайдағы Ұлттық құрылтайда Қазақстанға үш атом электр стансасын салу керектігін айтқан болатын. Екінші және үшінші АЭС орын тебетін өңірді анықтау үшін елдің энергетикалық жүйесі терең талдаудан өту керек.

- Екінші және үшінші АЭС-ті салуға әлеуетті аудандарды анықтау үшін өңірлерге электр энергиясына болжамды қажеттіліктер, экономикалық өсу қарқыны, демографиялық динамика және т.б. талдаулар жүргізіледі.

Қазақстанда қуат көзіне деген сұраныс жыл сайын артып келеді. Көптеген ЖЭО ескі және қатты тозғандықтан, ұзақ уақыт бойы өз мүмкіндіктерінің шегінде жұмыс істейді. Олар қолданыстағы қуатты айтарлықтай арттыру мәселесін шешпейді. Электр энергиясының тапшылығын АЭС салу арқылы жабуға болады, - деп жазады ведомство мамандары.