Хиджабсыз келген шахматшы қыздың амандығы үшін полицияға жүгіндік – шахмат федерациясы

0
770

Шахматшы қызды Қазақстаннан аман шығарып салу үшін шахмат федерациясы әрбір жүрген қадамына аса мұқият болған.


Хиджабсыз келген шахматшы қыздың амандығы үшін полицияға жүгіндік – шахмат федерациясы

ERNUR.KZ. Шахматтың рапид және блиц түрінен Алматыда өткен әлем чемпионатына ирандық шахматшы Сарасадат Хадемальшарьехтің хиджабсыз келуі ұйымдастырушыларды біраз тығырыққа тіреген. Өйткені белгісіз біреулер қайта-қайта қоңырау соққан. Бұл туралы "Қазақстан шахмат федерациясы" республикалық қоғамдық бірлестігінің вице-президенті Дәрмен Сәдуақасов Орталық коммуникациялар қызметінде айтты, деп жазады sputnik.kz.

"Біраз тәуекелге бас тіккеніміз рас. Турнир директоры ретінде өз әріптестеріме бұл жағдайға мұқият болу керектігін айттым. Өйткені белгісіз нөмірлерден бізге телефон шалғандар көп болды. Олар ирандық шахматшы қыздың тұратын жерін сұрады", - дейді Дәрмен Сәдуақасов.

Ол шахматшы Сарасадат Хадемальшарьехтің Қазақстаннан өз отанына емес, Испанияға ұшып кеткенін және жуық арада Иранға оралмайтынын айтты.

Шахматшы қызды Қазақстаннан аман шығарып салу үшін шахмат федерациясы әрбір жүрген қадамына аса мұқият болған. Испанияға ұшатын уақыты, маршруты құпия болып қалған. Федерация хиджабсыз шахматшының амандығы үшін тіпті Алматы әкімдігі мен полицияның көмегіне жүгінген.
Естеріңізге сала кетейік, ирандық шахматшы қыз Сарасадат Хадемальшарьех әлем чемпионатында хиджабын шешкен болатын. Оның бұл әрекеті отандастарының наразылығын тудырды. Сарасадат Алматыдағы чемпионатта орамалын шешкен жалғыз шахматшы емес. Басқа ирандық шахматшы Атуса Пуркашьян да солай істеген. Алайда Хадем мен Пуркашьян өз әрекетінің себебі туралы ешкімге тіс жармаған. Көпшілік олар Ирандағы наразылықтарға қолдау ретінде хиджабтарын шешті деп тұжырымдады.
Иранда қыркүйек айында хиджабты дұрыс кимегені үшін полицейлердің қолынан қаза болған Махса Аминидің өліміне байланысты жаппай наразылық болған еді.