Қонаевтағы полигонда роталық тактикалық оқу-жаттығу кезеңі өтті

ERNUR.KZ. Қонаев гарнизонының 32363 әскери бөлімі «Шошқала» полигонында оқу-жауынгерлік тапсырмаларды орындады. Жеке құрам заманауи ұрыс жағдайына барынша жақындатылған ортада өз шеберліктерін шыңдады, деп жазады azattyq-ruhy.kz.

Жаттығу қалай өтті?

Роталық тактикалық оқу-жаттығу – әскери дайындықтың маңызды кезеңі. Жаттығу барысында сарбаздар мен офицерлер келесідей міндеттерді атқарды:

Қарсыласқа соққы беру: әскери қызметшілер қарсыластың бетін қайтару және жою тактикасын пысықтады.

Қару-жарақпен жұмыс: штаттық қарудың барлық түрінен оқ ату жаттығулары өткізілді.

Басқару шеберлігі: командирлердің бөлімшені басқару және жедел шешім қабылдау қабілеті тексерілді.

«Жеке құрам тапсырмаларды ұрыс жағдайына барынша жақындатылған ортада орындады. Біз үшін бөлімшенің іс-қимыл үйлесімділігі мен бұйрықтардың нақты орындалуына қол жеткізу маңызды болды», – деді 32363 әскери бөлімінің рота командирі, гвардия капитаны Ақниет Шышнаби.

Шараның басты мақсаты – бөлімшелердің жауынгерлік әзірлік деңгейін көтеру және әскери қызметшілердің кәсіби шеберлігін жетілдіру. Оқу-жаттығу қорытындысы бойынша бөлімшелердің тапсырмаларды орындау дайындығына жоғары баға берілді.