Аурудың көп бөлігі Шығыс Қазақстан, Солтүстік Қазақстан және Павлодар облыстарында анықталды.
ERNUR.KZ. ҚР Денсаулық сақтау министрлігінің ресми өкілі Бағдат Қоджахметов коронавирус инфекциясымен ауырған балалардың жағдайы туралы айтты, деп жазады zakon.kz.
2 сәуір мен 7 қазан аралығында республикамызда коронавирус инфекциясының диагнозы расталған 2 551 бала тіркелді. 5 қазандағы жағдай бойынша республикамызда мектеп оқушылары арасында коронавирус инфекциясының 138 жағдайы тіркелді, оның 52-сі кезекші сыныптарда, 86-сы қашықтықтан оқып жатқан оқушылар арасында анықталды.
Тағы бір жағдай интернатта анықталды. Бүгінгі күні барлық байланысты тұлғалар анықталып, карантинге 14 күнге орналастырылды.
"7 қазандағы жағдай бойынша бір айдан 18 жасқа дейінгі 74 бала коронавирусқа шалдыққан. Аурудың көп бөлігі Шығыс Қазақстан, Солтүстік Қазақстан және Павлодар облыстарында анықталды. 10 бала ауруханаға жатқызылды - бұл 14,3%, үй карантинінде - 60 бала немесе 86% дерлік. Жалпы, 32 бала симптомы білінбейтін КВИ жұқтырған, 31 бала да жеңіл түрімен, жетеуі орташа ауырлық дәрежесіне ие, оның ішінде бір балаға бактериялық пневмония диагнозы қойылды, ал екіншісіне Covid-19 белгілері бар, асқынған вирустық пневмония анықталды. Барлығы 46 мектеп пен балабақшадағы кезекші топқа барған үш бала қадағалауға алынды", - деді Бағдат Қоджахметов ОКҚ брифингінде.
Ол барлық азаматтарды мұқият болуға, маска киюге, зарарсыздандыру құралдарын қолдануға және әлеуметтік арақашықтықты сақтауға шақырды. Бір апта бұрын елімізде мектеп оқушылары арасында COVID-19-дың 104 жағдайы тіркелген.
