Олар иіс газына уланып, есінен танып қалған.
Фото: Azattyq Rýhy/Әсет Құндақбаев
ERNUR.KZ. Қостанай облысында екі жас жігіт иіс газына уланып, есінен танып қалды. Оларды құтқарушылар гараждың жертөлесінен шығарып үлгерді, деп жазады azattyq-ruhy.kz.
Оқиға Қостанай қаласындағы жылыжай кешені маңында орналасқан гаражда болған. 2002 және 2003 жылы туған екі азамат тереңдігі шамамен екі метр болатын жертөле кеңістігіне түскен, содан кейін өздерін жайсыз сезініп, есінен танып қалған.
Олардың үшінші жолдасы (2001 жылы туған) уақтылы әрекет етіп, сыртқа шығып, 112 нөмірі арқылы құтқарушыларды шақырған.
«Құтқарушылар ауа аппараттарын пайдаланып, жертөлеге түсті де, ер адамдарды жер бетіне шығарып, дәрігерлерге тапсырды. Медициналық қызметкерлер алғашқы көмек көрсетіп, екеуін ауруханаға жеткізді», – делінген ТЖМ хабарламасында.
Оқиғаның себебі анықталды
Алдын ала болжам бойынша, оқиғаға жұмыс істеп тұрған генератордың шығарындылары себеп болған.
- Жабық кеңістікте жиналған газдар оттегіні ығыстырып, улану мен тұншығуға әкелген.
- Құтқарушылар оқиғаның нақты мән-жайын анықтау үшін тексеру жүргізіп жатыр.
