Қызылорда облысында мектеп шатыры опырылып, бір адам қаза тапты

ERNUR.KZ. Қызылорда облысында мектеп шатыры опырылып, көгершіндерді ауламақ болған екі ер адам төбеден құлаған. Олардың бірі қаза болды, деп жазады tengrinews.kz.

Оқиға 28 қаңтарда Қызылорда облысының Сырдария ауданында болған. Бұл туралы тәуелсіз журналист Үйтолған Жареке Facebook-парақшасында жазды.

"Сырдария ауданындағы Әбділда Тәжібаев атындағы мектеп-лицейдің шатыры опырылып, бір адам қайтыс болды. Ғимарат ескі емес. 28 қаңтар күні сағат 23.00 шамасында мектеп электригі қасына танысын ертіп шатырға шығады. Кептер ауламақ ниетте. Алайда үш қабатты ғимарттың төбесі опырылып, біреуі жертөлеге құлап қайтыс болыпты", - деп жазған ол жазбасында.

Сырдария аудандық ПБ қызметкерлері өздерінің ресми жауабында дерек бойынша облыстың ішкі істер департаменті тексеру жүргізіп жатқанын жазды.

"ҚР Қылмыстық-процестік кодексінің 204-бабына сәйкес, тергеу барысы жарияланбайды", - делінген жауапта.