Мемлекеттік өнеркәсіптік меншіктің тізілімінде 37 мыңға жуық өнертабыс тіркелген

11.03.2025 16:36

223

Бұл туралы Орталық коммуникациялар қызметінің алаңында ҚР Әділет министрлігінің ресми өкілі Талғат Уәли мәлімдеді.

ERNUR.KZ. Қазақстандық ғылымның белсенді дамуы елдің технологиялық прогресіне ықпал етеді. Әділет министрлігінің мәліметінше, Қазақстан Республикасының өнеркәсіптік меншігінің мемлекеттік тізілімінде 37 190 өнертабыс және 10 198 пайдалы модель тіркелген. Бұл туралы Орталық коммуникациялар қызметінің алаңында ҚР Әділет министрлігінің ресми өкілі Талғат Уәли мәлімдеді.

Спикердің айтуынша, бұл әзірлемелер елдің жоғары ғылыми және инженерлік әлеуетін көрсетеді, алайда олардың көбі әзірге жобалар сатысында қалып отыр және оларды іс жүзінде іске асыру мерзімдері белгісіз болып қалуда.

«Тіркелген зияткерлік меншік объектілерінің мысалы ретінде бірнеше перспективалық әзірлемелерді келтіруге болады. Бұл тік ұшу және қону ұшқышсыз әуе кемесі. Патент иесі – «Қазақстан инжиниринг» Research & Development орталығы» ЖШС. Пайдалы модель-аэродинамикалық қасиеттерін жақсарту есебінен ұшу уақытын ұлғайтуды, ұшу және қону кезінде пайдалы жүктемені қорғауды, берілген маршрут бойынша автоматты пилоттық мүмкіндікті қамтамасыз ететін түпнұсқа конструкциясы бар ұшқышсыз ұшу аппараты (ҰҰА). Екінші жоба-шынжыр табанды платформаға негізделген роботтандырылған жерүсті кешені. Патент иесі – «Қазақстан инжиниринг» Research & Development орталығы» ЖШС. Кешеннің модульдік дизайны оны әскери қолданудан бастап өрт сөндіруге дейінгі түрлі міндеттерге бейімдеуге мүмкіндік береді. Жобада қосымша жабдықтар орнату және жүктерді
тасымалдау мүмкіндігі қарастырылған», - деді Талғат Уәли.

Тағы бір жоба - электромобильдерді жеделдетілген зарядтауға арналған зарядтау станциясы. Патент иесі – «М. Әуезов атындағы Оңтүстік Қазақстан университеті» КЕАҚ. Бұл жоба электр машиналарын зарядтау тиімділігін арттыруға, желінің шамадан тыс жүктелуін болдырмауға және бір уақытта алты машинаны зарядтауға мүмкіндік береді.