"Орындық астына тығылып жатады": Ақтөбедегі интернатта темір торлы бөлмеде табақтан ас ішкен науқастың видеосы тарады (видео)

0
187

Ақтөбелік әлеуметтік желі парақшаларында №2 әлеуметтік қызмет көрсету орталығында ем алып жатқан науқас түсірілген видео тарады.


Фото: Видеодан скрин

ERNUR.KZ. Ақтөбедегі №2 әлеуметтік қызмет көрсету орталығының науқасты бөлек бөлмеде ұстайтыны түсірілген видео желіде тарады, деп жазады stan.kz.

Ақтөбелік әлеуметтік желі парақшаларында №2 әлеуметтік қызмет көрсету орталығында ем алып жатқан науқас түсірілген видео тарады. Видеода оқшаулау бөлмесінде отырған науқастың темір есіктен табақ алып жатқаны көрінеді. Науқас темір табақтан су ішіп болған соң орындықтың астына барып тығылады.

Мейіргер Рустам Әжіғалиевтің айтуынша, науқас психологиялық жағдайы бойынша бір өзі оқшауланған бөлмеде жатады.

“25 жастағы жігіт Байғанин ауданының тумасы. Орталықта 2019 жылдан бастап тұрады. Ата-анасы бар. Орталық қызметкерлері оны айналасына қауіп төндірмес үшін оқшаулаған. Оның жанына ешкім жолай алмайды. Ол үнемі осындай жағдайда. Әйелдің шашына жармасады, ер адамды тістейді. 2019 жылдан бастап жатыр”, – деді мейіргер.

Орталық директоры видеоның желіге басқа науқастың атынан салынғанын айтты.

“Әлеуметтік желіге Айтжан есімді біздің тұрғынның атымен салған. Тұрғындарымыздың қорғаншысы – мен. Олар өздерінің іс-әрекеттеріне жауап бере алмайтын болған соң мен жауап беремін. Емделуші Айтжанда телефон жоқ. Кім пайдаланып отыр, белгісіз. Оны құқық қорғау органдары анықтайды. Шағым түсірдім, материалдарды көрсеттім. Біздің тұрғындар телефон ұстамайды. Күзде және көктемде жүйке ауруы қозады. Кейбір тұрғындарды денсаулық сақтау мекемесіне апарып, емдейміз. Оған дейін оқшаулап ұстауға тура келеді. Себебі олар өздеріне қиянат жасауы мүмкін немесе өзге тұрғынға, қызметкерлерге кері әсері тиюі мүмкін. Оқшаулау арқылы емдейміз. Ол заңға қайшы емес. Тұрғындардың өздерінің қауіпсіздігі үшін жасалып жатқан дүние”, – деді орталық директоры Гүлназ Сейсенова.

Әлеуметтік желіге видео салды деген Айтжан есімді жігіт орталық емделушісі. 25 жастағы жігіт бұл жерде 2020 жылдан бері тұрады. Ол мұнда заңсыз жатқанын айтып, бірнеше рет қашып кеткен. Биыл да 26 наурыз күні қашып, 27 наурызда қызметкерлер тауып әкеліп, психиатр жолдамасымен емдеуге жіберген.

Науқастар 5 мезгіл тамақ ішеді. Дәрі 2-3 мезгіл беріледі. Орталықтың кітапхана, ойын бөлмесі, шеберхана бөлмелерінде емделушілер уақыт өткізеді.

Ақтөбедегі №2 әлеуметтік қызмет көрсету орталығы 430 тұрғынға арналған. Мұнда жүйкесі ауыратын, психикалық дамуы тежелген 427 адам тұрады. Орталықта 64 жастан жоғары 35 әйел, 24 ер адам бар. 18-24 жастағы жастар саны 12. Олардың ішінде 89 адамның мүгедектігі бар. Науқастарға 200-ге жуық қызметкер ауысыммен қызмет атқарады.

Орталық іші ескірген. Соңғы рет 2004 жылы күрделі жөндеу жүргізілген.