Республика күніне орай демалыс күні ауыстырылды - қаулыға қол қойылды

ERNUR.KZ. Республика күнін мерекелеу аясында демалыс күнін ауыстыруды көздейтін Үкімет қаулысына қол қойылды, деп жазады inform.kz.

ҚР Премьер-Министрі Әлихан Смайылов «2022 жылы демалыс күндерін ауыстыру туралы» ҚР Үкіметінің 2021 жылғы 6 қазандағы №713 қаулысына толықтыру енгізу туралы» Үкіметтің 07.10.2022 жылғы №796 қаулысына қол қойды.

Қаулыға сәйкес, демалыс күні 2022 жылғы 22 қазан, сенбіден 2022 жылғы 24 қазан, дүйсенбіге ауыстырылады.

Биыл 25 қазанда еліміздің ұлттық мерекесі ретінде алғаш рет Республика күні аталып өтеді. Демалыс күнін ауыстыру жұмыс істейтін қазақстандықтарға мереке кезінде демалысын алдын ала жоспарлауға мүмкіндік береді.

Осы қаулы алғашқы ресми жарияланған күннен кейін қолданысқа енгізіледі», - делінген primeminister.kz сайтында.

Бұған дейін хабарлағанымыздай, Сенат 25 қазан – Республика күнін ұлттық мереке ретінде белгілейтін заңды қабылдады.

Кейін ҚР Президенті Қасым-Жомарт Тоқаев тиісті заңға қол қойды.

Бұдан әрі Республика күніне байланысты демалыс күндерін ауыстыру туралы құжат жобасы «Ашық» НҚА сайтында жарияланды.