Сарыөзектегі суицид: Марқұмның туыстары полиция қызметкерлерін кінәлайды

06.03.2025 17:28

237

Куәгерлердің айтуынша марқұм, жерге ұялы телефонын қойып, жанына хат жазып қалдырған.

Фото: Айбек Құттыбек

ERNUR.KZ. Жетісу облысында 27 жастағы жігіт өзіне қол салды. Ал туыстары оның өліміне полиция қызметкерлерін кінәлап отыр, деп жазады inform.kz.

Олардың айтуынша, полицейлер оған істемеген қылмысты мойнына алдыртпақ болған.

Азат Құдайбергенов өзіне қол салар алдында інісіне қоңырау шалып, ауыл сыртына тезірек келуін өтінеді. Іле- шала артынан барған әкесі мен бауыры марқұмды тоқ бағанына асылып тұрған жерінен тапқан.

Куәгерлердің айтуынша марқұм, жерге ұялы телефонын қойып, жанына хат жазып қалдырған.

- Біз келсек темір бағанда асылып тұр. Әкем екеуміз жерге түсіріп алдық. Арқан ағамның мойынын қиып жіберген. Соңғы демі сол жерде шықты. Артынша туысқан ағамызды шақырдық. Ол кісі келіп бірден 102- ге қоңырау шалды. Полицейлер 15-20 минутта келіп, бәрін фотоға түсіріп, мүрдені алып кетті. Жедел жәрдем шақырайық дегенге көнбеді,- деді інісі Сағат Құдайбергенов.

Қара жамылған отбасы оқиға орнына жедел жәрдем шақыртпаған полиция қызметкерлеріне наразы. Анасы ұлының өліміне де соларды кінәлайды. Дүкенде болған ұрлыққа жазықсыз 2 баламды тергеп, оларға қысым көрсетті деп отыр.

- Мұның алдында 2 ұлым Сарыөзектегі жеміс- жидек дүкенінде істеген. Бұлар жұмыстан шығып кеткеннен кейін дүкенде ұрлық болады. Соған екеуін күдікті деп 2 күн сүйреді. Азат 3-ші күні өзіне салды. Қаза болған соң денесін мәйітханаға апармай полиция бөлімшесінде ұстаған. Бізді ішке кіргізбей қойды. Тек кешке қарай ғана Талдықорғандағы мәйітханаға жіберген. Оған дәлел мәйітті алуға барғанда сол жердегі кезекші қыздар ұлымның денесі кешкі сағат 8-00-дер шамасында ғана жеткізілгенін айтты. Мүрдесін көрдік. Ерінінің айналасы көгерген, қолы жырылған, көзінің жанында да сырылған жері бар, - деді анасы Гүлбағиза Оңғарбаева.

Туыстарының қолындағы хатта қысым көрсеткен полиция қызметкерінің аты- жөні жазылған. Бұл іс бойынша құзырлы орган өкілдері іс қозғалғанын мәлімдеді.

- Жетісу облысы Полиция департаментінің Өзіндік қауіпсіздік басқармасы «Өзін-өзі өлтіруге дейін жеткізу» фактісі бойынша қылмыстық істі тергеуде. Қажетті кешенді тексеру шаралары жүргізілуде. Қазіргі уақытта оқиғаның барлық мән-жайы анықталып жатыр. Тараптардың барлық уәждері, мәлімдемелері, сондай-ақ марқұмның туыстары ұсынған мәліметтер тергеу барысында мұқият зерттелетін болады. ҚР ҚПК-нің 201-бабына сәйкес, өзге мәліметтер жария етуге жатпайды. Тергеу Полиция департаменті басшылығының ерекше бақылауында,- деді Жетісу облыстық полиция департаментінің баспасөз қызметі.

Марқұмның отбасы істің әділ тергелуін талап етеді.