Тоқаев Ақмола облысының әкіміне бірқатар тапсырма берді

22.07.2021 15:49

411

Мемлекет басшысы Ақмола облысы әкімінің есебін тыңдады.

Президент Қасым-Жомарт Тоқаев Ақмола облысының әкімі Ермек Маржықпаевпен өңірді дамытудың өзекті мәселелерін телефон арқылы талқылады. Бұл туралы Мемлекет басшысының баспасөз хатшысы Берік Уәли мәлімдеді, деп хабарлайды ERNUR.KZ.

Мемлекет басшысына облыстың бірінші жартыжылдықтағы әлеуметтік-экономикалық даму қорытындылары баяндалғаны хабарланды. Негізгі көрсеткіштер бойынша өсімнің оң қарқыны бар екені атап өтілді.

"Қасым-Жомарт Тоқаевқа коронавирус індетіне қарсы күрес бойынша жүргізіліп жатқан жұмыстар туралы мәлімет берілді. Облыста вакцина салдыруға тиісті халықтың 49 пайызы екпе алған. Сұранысқа ие дәрі-дәрмектердің екі айлық азайтылмайтын қоры әзірленген.

Бұдан бөлек облыс әкімі Президентке егін егу және жем-шөп дайындау мәселелері туралы айтты. Ауыл шаруашылығы дақылдары егілген жер көлемі 5 миллион гектардан асады. Өңірдегі жауын-шашынның аздығынан Торғай аймағы (Жарқайың, Есіл, Жақсы аудандары) көбірек зардап шекті. Осыған байланысты көршілес аудандарда бірлесе шөп дайындау жұмыстары ұйымдастырылады", - деп жазды Берік Уәли.

Сонымен қатар Ермек Маржықпаев Мемлекет басшысының тапсырмаларының орындалу барысы туралы баяндады. Атап айтқанда Қосшы ауылына облыстық маңызы бар қала мәртебесін беру жөнінде, жылу электр орталығын салу үшін әлеуетті инвесторлар іздестіріп жатқанын, сондай-ақ, су басатын аймақ тұрғындарын көшіру үшін Атбасар қаласында 100 пәтерлік екі үйдің құрылысы басталғанын жеткізді.

Еліміздегі елеулі саяси оқиға – ауыл әкімдерін сайлауға дайындық барысына ерекше мән берілді. Жалпы облыс бойынша 95 әкім сайланады. Әңгімелесу соңында Мемлекет басшысы бірқатар нақты тапсырма берді.