Тортының құны – 20 млн теңге, қонақтары – Бесбаев пен Сабыров: танымал блогер туған күнін дүркіретіп тойлады (видео)

ERNUR.KZ. Танымал блогер Дархан Жолшыбеков әйелі Дариғаның туған күнін аса дарақылықпен тойлаған. Олар P.Diddy-дің «ақ кештерін» басшылыққа алған болуы керек, себебі туған күн қонақтарының дресс-коды ақ киім болған, деп жазады azattyq-ruhy.kz.

Жақында некесіз баласы бар екені белгілі болып, басы дауға қалған блогер Дархан Жолшыбеков тағы да елді шулатты.

Бұл жолы ол әйеліне елде болмаған той жасап берген. Дариға Нұкееваның 26 жасына Қазақстанның әншілері мен блогерлерінен басқа, Ресейден ат терлетіп танымал әзілкеш Нұрлан Сабыров та келген.

Осы кешті жүргізген де сол болды. Ал қазақ эстрадасының королі Мейрамбек Бесбаев, Ғазизхан Шекербеков, Мәдина Сәдуақасова сынды әншілер туған күн иесі үшін ән салған.

Сондай-ақ туған күн иесі үшін құны 20 млн теңгенің торты әзірленген. Оның ұзындығы 2 метрге жуықтайды, зәулім сарай сынды тәтті бәліштің қақ ортасында блогердің лақап аты - «DARICORN» деген жазуды байқауға болады.

Бұған дейін жазғанымыздай, Дархан Жолшыбеков әйеліне 150 млн теңгенің темір тұлпарын сыйлаған еді. Дегенмен, БАҚ беттерінде ол басқа әйелден туған қызына ай сайын 15 мың теңге алимент төлеп келгені жазылған. Кейін блогер қызына пәтер мен көлік сыйлағаны хабарланған болатын.