Ұлытау облысындағы шахтадағы төтенше жағдай: қаза тапқан кеншілердің тізімі жарияланды

0
271

Дүйсенбіде "Қазақмыс" корпорациясына қарасты "Жомарт" кенішіндегі шахтада тау жынысы опырылды.


Ұлытау облысындағы шахтадағы төтенше жағдай: қаза тапқан кеншілердің тізімі жарияланды

Фото:Турар Казангапов

ERNUR.KZ. Ұлытау облысында "Жомарт" шахтасындағы төтенше жағдай кезінде қаза тапқан кеншілердің тізімі жарияланды, деп жазады tengrinews.kz.

17 ақпан, дүйсенбіде "Қазақмыс" корпорациясына қарасты "Жомарт" кенішіндегі шахтада тау жынысы опырылды. Оқиға салдарынан жеті қызметкер үйінді астында қалды. Кейін барлық кенші қаза болғаны туралы ақпарат тарады. Ең жасы 26 жаста болған.

Қаза тапқан кеншілердің тізімі:

  • Ақшалов Қайрат Аманбекұлы, 1975 жылы туған, сорғы қондырғыларының машинисті;
  • Жақубаев Ардақ Боранбайұлы, 1998 жылы туған, жер асты учаскесінің тау-кен шебері;
  • ⁠Жұмаділлаев Бақытбек Нышанұлы, 1975 жылы туған, жер асты кен жұмыскері;
  • ⁠Кенжебеков Орынбек Әмірханұлы, 1991 жылы туған, тиеу-тасымалдау көлігінің машинисті;
  • Молдабеков Ғалымжан Есенбекұлы, 1978 жылы туған, шпур бұрғылау көмекшісі;
  • Нұрұлдаев Олжас Жағалбайұлы, 1979 жылы туған, жер асты учаскесінің энергетигі;
  • Рожков Константин Владимирович, 1992 жылы туған, жер асты тау-кен өткел жабдықтарының электрослесарь-монтаждаушысы.
Еске салсақ, дүйсенбі күні "Жомарт" кенішіндегі шахтада тау жынысы опырылып, салдарынан 7 жұмысшы үйінді астында қалып қойған еді. Кабельдердің үзілуіне байланысты жұмысшылармен байланыс үзілгені хабарланды. Кейінірек жеті адамның денесі табылып, жер бетіне шығарылғаны хабарланды.

Қазақстан премьер-министрі Олжас Бектеновтің тапсырмасымен апаттың себептерін анықтау және зардап шеккендерге көмек көрсету үшін арнайы комиссия құрылды. Оны премьер-министрдің орынбасары Қанат Бозымбаев басқарады.

Ұлытау облысы әкімдігі де қаза тапқан жұмысшылардың отбасылары мен жақындарына қажетті психологиялық және әлеуметтік қолдау көрсететінін мәлімдеді.

"Жомарт" кеніші Жезқазған қаласынан оңтүстік-шығысқа қарай 130 шақырым жерде орналасқан. Онда мыс сульфиді өндіріледі. Ал "Қазақмыс" корпорациясының ірі акционері - Kazakhmys Copper.