Жол-көлік оқиғасынан екі адам жарақат алды.
ERNUR.KZ. Алматыда 5 көлік соқтығысып, екі адам зардап шекті, деп жазады ҚазАқпарат.
Әлеуметтік желілерде Алматының әл-Фараби даңғылында болған жол апаты мен содан туындаған көлік кептелісінің видеосы тарап жатыр.
Алматы қалалық Полиция департаментінің мәліметінше, жол-көлік оқиғасынан екі адам жарақат алды.
«Алдын ала мәлімет бойынша, «Hyundai Elantra» автокөлігінің жүргізушісі әл-Фараби даңғылымен шығыс бағытта қозғалып, қатардан қатарға маневр жасаймын деп жанынан өтіп бара жатқан «Hyundai Sonata» және «Hyundai Accent» көлігімен соқтығысқан. Одан кейін жолдың бойында өсіп тұрған шыршаға соғылып, қарама-қарсы жолаққа ұшып кеткен. Ол жерде «Ssang yong» және «Toyota Camry» көліктерімен соғылады. Жол-көлік оқиғасы салдарынан «Hyundai Elantra» жүргізушісі мен «Hyundai Sonata» жолаушысы жарақат алды», - деп хабарлады Алматы қалалық ПД тергеу басқармасының бастығы Олжас Шәріпов.
Оқиға бойынша тиісті сараптамалар тағайындалды.
