МАФИЯ ойыны арқылы сабақ өткізу: тиімді әдіс әрі ШЫҒАРМАШЫЛЫҚ ТӘСІЛ

көрнекілік: nastolka24.ru

Қазіргі білім беру жүйесінде ойын әдістерін қолдану оқушылардың пәнге деген қызығушылығын арттырып, оқу процесін жеңіл әрі тиімді етеді. Соның ішінде, "Мафия" ойыны барлық оқушының сүйікті ойыны. Егер бұл ойынды сабаққа енгізсек, жаңа сабақ оқушы үшін әрі тиімді, әрі қызықты болар еді. Бұл ойын оқушылардың сыни ойлау, логика және көшбасшылық қабілеттерін дамытуға арналған шығармашылық тәсіл болады. Сондықтан осы мақалада "Мафия" ойынын сабақ барысында қолданудың әдістері, тиімділігі және оны қалай ұйымдастыруға болатыны қарастырылады.

"Мафия" – командалық рөлдік ойын, онда қатысушылар екі топқа бөлінеді: бейбіт тұрғындар мен мафия. Мафияның мақсаты – барлық бейбіт тұрғындарды ойыннан шығару, ал бейбіт тұрғындардың мақсаты – мафияны анықтап, оларды ойыннан шығару. Ойын екі кезеңнен тұрады: "түн" және "күн". Түнде мафия мүшелері жасырын әрекет етіп, бір бейбіт тұрғынды ойыннан шығарады, ал күнде барлық ойыншылар мафияны анықтауға тырысады. Енді осы «Мафия» ойынын сабақта қалай қолдануға болады?

Мысалы, әдебиет сабағында Мұхтар Әуезовтің "Абай жолы" романын оқып жатырмыз делік. Оқушыларды романдағы кейіпкерлердің рөлдеріне бөлеміз: Абай, Құнанбай, Оспан, Бөжей және т.б. Мафия рөлін қоғамдағы әділетсіздік немесе надандық ретінде бейнелеуге болады. Оқушылар әр кейіпкердің мінез-құлқын, әрекеттерін талдай отырып, кімнің "мафия" екенін анықтауға тырысады. Бұл әдіс оқушыларға кейіпкерлердің арасындағы қарым-қатынасты түсінуге, олардың іс-әрекеттерінің мотивтерін талдауға көмектеседі.

Немес, тарих сабағында "XIX ғасырдағы Қазақстандағы ұлт-азаттық қозғалыстар" тақырыбын өттік делік. Оқушыларды сол кезеңдегі негізгі тұлғалардың рөлдеріне бөлеміз: Кенесары Қасымұлы, Жанқожа Нұрмұхамедұлы, патша үкіметінің өкілдері және т.б. Мафия рөлін патша үкіметінің жергілікті халыққа жасаған қысымшылығы ретінде бейнелеуге болады. Оқушылар әр тұлғаның әрекетін, оның тарихи маңызын талдай отырып, кімнің "мафия" екенін анықтауға тырысады. Бұл әдіс оқушыларға тарихи оқиғаларды тереңірек түсінуге, олардың себеп-салдарын анықтауға және тарихи тұлғалардың рөлін бағалауға көмектеседі.

Дәл солай, жас ерекшелігін бөлмей, бастауыш сынып оқушыларымен де бұл ойынды сабаққа кіріктіруімізге болады. Бастауыш сыныптарда "Мафия" ойынын қарапайым түрде қолдануға болады. Мысалы, "Жеміс бағы" тақырыбында оқушыларды алма, алмұрт, банан сияқты жемістердің рөлдеріне бөлеміз. "Мафия" рөлін бақтағы зиянкестер ретінде белгілейміз. Оқушылар жемістерді қорғап, зиянкестерді табуға тырысады. Бұл әдіс балаларға жемістер туралы білімдерін кеңейтуге, топпен жұмыс істеуге және логикалық ойлауға үйретеді.

"Мафия" ойынын сабақта қолдану – оқушылардың оқу үдерісіне деген қызығушылығын арттыратын, олардың логикалық, шығармашылық және коммуникативтік дағдыларын дамытуға бағытталған тиімді педагогикалық әдіс. Мұғалімдер осы ойынды сабақ үдерісіне енгізу арқылы оқушыларды белсенділікке ынталандырып, оларды өзара пікір алмасуға, бірлесе жұмыс істеуге және өз ойларын дәлелдеуге үйретеді. Бұл әдіс оқушылардың танымдық белсенділігін арттырумен қатар, олардың сабаққа деген ынтасын күшейтіп, оқу үдерісін қызықты әрі тиімді етеді.