4,3 млн: Шымкентте «Таза қала» акциясы басталды

Шымкент қаласында «Таза қала» акциясы басталды, деп хабарлайды ERNUR.KZ.

Жыл сайын дәстүрге айналған «Таза қала» акциясы биыл да Азаматтық альянс қоғамдық ұйымының бастамасымен жалғасын таппақ.

Қоғамдық ұйымның өкілі Юсуп Арзыхановтың айтуынша, акцияға қатысуға қаланың барлық тұрғындары өтініш білдіре алады. Жас ерекшеліктеріне ешқандай шектеу жоқ. Яғни шаһардың кез-келген тұрғын қатыса алады.

Аталған акцияның басты мақсаты – тұрғындардың қала мен ауласын таза ұстауға біріктіру. Бұл жоба ең таза аула мен үздік көшені анықтауға, сондай-ақ қала тазалағын сақтауға бағытталған.

– Үміткер арнайы өтініш қағазын толтырып, аудандық әкімдікке тапсырады. Қаланың төрт әкімдігінен құралған жұмыс тобы айына екі рет үміткерлердің тазалық жұмыстарына мониторинг жасап, ай сайын аумақты фото, видеоға түсіріп, әр аудан өзінің жеңімпаздарын анықтайды. Ал қорытынды нәтижені комиссия шығарып, кімнің жүлдегер атанғаны қазан айында белгілі болады. Байқау жеңімпаздары «Үздік аула», «Үздік көше», «Үздік үй», «Үздік тұрғын үй алабы», «Үздік аула сыпырушы» деп аталатын 5 номинация бойынша марапатталады, - деді Ю.Арзыханов.

Биылғы акцияның жүлде қоры 4,3 миллион теңге. Акция жеңімпаздарын бағалы сыйлықтар күтіп тұр. Азаматтық альянс төрағасы Жұмағали Білісбеков аталған іс-шараға кәсіпкерлерді бизнес әлеуметтік жауапкершілігі аясында атсалысуға шақырып отыр.

«Таза қала» акциясына биыл тура он жыл толады. 2012 жылы Азаматтық альянстың бастамасымен қолға алынған іс-шара қаланың жыл сайынғы дәстүрлі байқауына айналып үлгерді. Бір ерекшелігі мұндай акция республиканың өзге өңірлерінің ешбірінде жоқ.

Айта кетейік, жылдан жылға байқауға қатысушылардың саны артып отыр. Жобаның нәтижесі де жоқ емес. Шымкентте таза аула мен көшелер саны артып келеді. Ұйымдастырушылар аталған акцияға белсене қатысуға шақырады.