«AMANAT» партиясы Шымкент қалалық филиалына қарасты «Мирас» бастауыш партия ұйымының ұйымдастыруымен «Ұлттық мұра» партиялық жобасы аясында 11–14 жас аралығындағы жасөспірімдер арасында бокстан ашық біріншілік өтті.
Спорттық сайыс еліміздің мақтанышы, Олимпиада чемпионы Бекзат Саттархановтың есіміне арналды.
Іс-шараның басты мақсаты – жастарды спортқа баулу, олардың бойында патриоттық рухты және жеңіске деген жігерді қалыптастыру, сондай-ақ қазақ спортындағы даңқты тұлғалардың өмір жолын үлгі ету.
Жарыстың ашылу салтанатына «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, қалалық мәслихат депутаты, фракция мүшесі Лазиз Сулайманов, сондай-ақ Қаратау аудандық партия филиалының төрағасы Данияр Омаров қатысты.
Құттықтау сөз сөйлеген Ербол Байқонысов спорттың жас ұрпақ тәрбиесіндегі ерекше рөлін атап өтті:
«Бүгінгі турнир – тек жарыс емес, бұл – елдің намысын қорғаған ұлыларға тағзым. Бекзат Саттарханов сынды батыр ұлдарымыздың ерлігі мен еңбегі жастарға үлкен өнеге. Спорт – тәртіп пен рухтың мектебі, сондықтан да біз жас буынды салауатты өмір салтына баулуға әрдайым қолдау көрсетеміз», – деді ол.
Жарыс қорытындысында үздік нәтиже көрсеткен спортшылар І, ІІ және ІІІ орындармен марапатталды. Жеңімпаздарға «AMANAT» партиясының атынан алғыс хаттар мен медальдар табысталды.
Мұндай турнирлер алдағы уақытта да тұрақты түрде өткізіліп, жастар арасында спорт пен патриоттық құндылықтарды дәріптеуге бағытталмақ.
![](/assets/thumbnails/e6/e6b15d6f11e31e4c02b0535d26414ca1.jpg ""Бөлек тұрсам да күн бермейді": жас келіншек енесі мен қайын әпкелерін көргісі келмейтінін айтты")
