ШЫМКЕНТ: көктемгі науқанда мыңға жуық азамат әскер қатарына шақырылады

05.03.2024 09:34

436

2023 жылы 1856 азамат мерзімді әскери қызметке шақырылып, жоспар 104% орындалған.

ERNUR.KZ. Шымкент әкімі аудан әкімдеріне қала тазалығы бойынша тиісті тапсырмалар беріп, Наурыз мерекесіне дайындық барысын пысықтады.

Сондай-ақ аппараттық жиында көктемгі мерзімді әскери қызметке шақыру науқанына дайындық туралы баяндалды.

Шымкент қаласының Қорғаныс істері жөніндегі департаментінің бастығы Әбдіғабит Шегебаевтың айтуынша, 2023 жылы 1856 азамат мерзімді әскери қызметке шақырылып, жоспар 104% орындалған. Ал көктемгі науқанда 948 азаматты әскер қатарына шақыру көзделуде.

Мәжіліс барысында қалалық Ауыл шаруашылығы басқармасы басшысының м.у.а Талғат Мекамбаев атқарылған жұмыстар мен жоспарларын бөлісті.

Оның сөзінше, өткен жылы қалада ауыл шаруашылық саласына 16 млрд теңгеге инвестиция тартылып, жалпы өнім көлемі (80,1 мың тонна) 52,4 млрд теңгені құрады. Бүгінде мегаполис аумағында 15,2 мың тонна өнім жиналатын 139 гектар жылыжай кешендері орналасқан. Биыл бұл салада 14 инвестициялық жобаны жүзеге асыру жоспарланып отыр.

Сонымен қатар, Шымкент қаласы бойынша Сауда және тұтынушылардың құқықтарын қорғау департаментінің басшысы Нұрасыл Тулеев баяндама оқыды.

Нұрасыл Айдарханұлының мәліметінше, өткен жылы жеке және заңды тұлғалардың 4109 өтініші қаралып, қанағаттандырылған. Нәтижесінде, тұтынушыларға 182 миллион теңгеге жуық ақша қайтарылған.