ШЫМКЕНТ: Сыбайлас жемқорлыққа қарсы қызмет пен Кәсіпкерлер палатасы меморандумға қол қойды

Бүгін ҚР Сыбайлас жемқорлыққа қарсы іс-қимыл Агенттігінің Шымкент қаласы бойынша департаментінің бастамасымен Шымкент қаласының кәсіпкерлер палатасында бизнес өкілдерімен кездесу өтті, деп хабарлайды ERNUR.KZ.

Аталған жиынға қатысушылар еліміздегі сыбайлас жемқорлықтың алдын алу мақсатында Агенттікпен жүзеге асырылып жатқан жобалармен танысып, жемқорлықтың алдын алудағы ой­пікірлерін ортаға салды.

Сондай-ақ, шара барысында бизнестің және инвесторлардың мемлекеттік билік институттарына сенімін арттыру, олардың заңды құқықтары мен мүдделерін қорғау мақсатында жүзеге асырылып отырған «Protecting Business and Investments» жобасы кеңінен түсіндірілді. Департамент басшылығының айтуынша, кәсіпкерді тек кәсіпкерлік қызметі аясында ғана емес, сондай-ақ күнделікті өмірде бетпе-бет келетін барлық процестерде сүйемелдеу арқылы мақсатқа қол жеткізу күтілуде.

Сонымен қатар, кездесуде «Protecting Business and Investments» жобасы аясында инвесторларды сыбайлас жемқорлыққа қарсы сүйемелдеуге тағы 3 млрд. 541 млн. теңгені құрайтын 5 кәсіпорын Департаментпен екі жақты келісімге қол қойды.

Атап айтсақ, олар – «Оңтүстік» арнайы экономикалық аймағында орналасқан «B.A.E.R», «Tengri Canvas», «SG Style», «SAGITEX GROUP», «Шымкент-Кашемир» ЖШС инвестициялық жобалары. Осы орайда, Департамент инвесторлармен 20 келісімге қол қойды, ал сүйемелдеу жобаларының сомасы 53 млрд. 096 млн. теңгені құрайды.

Одан бөлек, кездесу соңында конструктивтілік, ашықтық, бірлескен іс-шаралардың тиімділігі және өзара ақпараттық алмасу қағидаларын сақтай отыра кәсіпкерлік саласының өсуі мен дамуының институционалды негізін қалыптастыру бойынша бірлескен шаралар қабылдау мақсатында Департамент пен қалалық кәсіпкерлер палатасы арасында өзара ынтымақтастық туралы екіжақты меморандумға қол қойылды. Яғни, кәсіпкерлік саласындағы жүйелі мәселелер екіжақты меморандум аясында қаралатын болады.