Шымкентте бір тәулікте 10 өрт оқиғасы тіркелген.
Шымкентте бір түнде 10 өрт оқиғасы орын алды деп хабарлайды Ernur.kz тілшісі.
Бүгін түнде кафелер мен дүкен, дөнер орталығынан өрт шыққан. 20 шілде күні сағат 03.30 шамасында Нұрсәт шағынауданы Шанин көшесінде орналасқан екі қабатты ғимарат өртенген. Ғимараттың бірінші қабатында орналасқан азық-түлік дүкені мен "Донер" орталығын шарпыған. Жалпы көлемі 160 шаршы метрді құрайтын ғимараттың 65 шаршы метрі қызыл жалында қалған. Өрт сөндірушілер сағат 03.38-де ауыздықтап, 04.00 кезінде өрт толығымен сөндірілген.
"Оқиға орнында өрт сөндіру бөлімінің жеке құрамынан 28 адам, 5 техникасы жұмыс атқарды. Сондай-ақ, Апаттар медицинасы орталығы филиалының 1 бригадасы жұмылдырылды. Оқиға салдарынан қайтыс болғандар мен зардап шеккендер жоқ,"- деп мәлімдеді Шымкент қаласы төтенше жағдайлар департаментінің баспасөз қызметі. Дәл сол уақытта Шымкент қаласы Еңбекші ауданы аумағында "Кортус" кафесінен өрт шығып тілсіз жау көрші "Инстабар" кафесін де шарпыған. "Ерімбетов көшесінде орналасқан «Кортус» кафесінің ауласында көлемі 195 шаршы метр ағаш орындықтары, тапшандар және ағаш қоршаулары жанып, қасында орналасқан 120 шаршы метр құрайтын «Инста бар» кафесіне өтіп, көлемі 32 ш.м. сыртқы қаптамасы, 4 ш.м. ішкі қаптамасы жанды. Зардап шеккендер мен қайтыс болғандар жоқ. Өрттің беті 04 сағат 37 минутта оқшауланып, 04 сағат 41 минутта толығымен сөндірілді. Өртті сөндіруге Өрт сөндіру қызметінің жеке құрамында 36 адам, 7 техникасы және «Апаттар медициналық орталығы» филиалының 1 бригадасы жұмылдырылды,"- деп мәлімдеді Шымкент қаласы төтенше жағдайлар департаментінің баспасөз қызметі.
Айта кету керек, Шымкентте бір тәулікте 10 өрт оқиғасы тіркелген. Өрт сөндірушілердің айтуынша, дені құрғақ шөп пен қоқыс контейнерлері жанған
