«Шымкентті Кинг-Таун секілді тамақтың астанасы етуге болады»: Е.Айтаханов Оңтүстік Африка елшісімен кездесті

Шымкент қаласының әкімі Ерлан Айтаханов Оңтүстік Африка Республикасының Қазақстан Республикасындағы Төтенше және өкілетті елшісі Кийтуметци Сийпело Тандека Мэттьюспен кездесті , деп хабарлайды ERNUR.KZ.

Аталған кездесу барысында қос тарап өзара мәдени-гуманитарлық ынтымақтастық пен қарым-қатынасты дамыту жайын талқылап, серіктестік жобалар мен ортақ мүдделерді сөз етті. Сонымен қатар, кездесу барысында Оңтүстік Африка Республикасымен өзара ынтымақтастықты күшейту – Қазақстанның сыртқы саясатындағы маңызды бағыттардың бірі екенін айтқан қала басшысы, мегаполисте инвесторларға қолайлы жағдай жасалғанын және түрлі бағыттар бойынша әріптестік байланысты дамытуға ашық екенін жеткізді.

Өз кезегінде, мәртебелі мейман да Қазақстан мен ОАР арасында достық қатынастың берік екенін жеткізіп, осы байланысты одан әрі дамытудың маңыздылығын атап өтті. Сонымен қатар, елші туризм саласы мен тамақ өнеркәсібі бағытында бірлескен ортақ жобаларды іске асырудың мүмкіндіктерін айтты.

«Шымкент қаласы тамақ өнеркәсібін дамытуға қолайлы аймақ, өйткені мұнда көкөністер мен жемістер жеткілікті. Сондықтан Шымкентті Кинг-Таун секілді тамақтың астанасы етуге болады», - дейді Кийтуметци Мэттьюс.

Сондай-ақ, Ерлан Айтаханов туризм саласындағы бірлескен жобаларды іске асыруға Шымкент қаласының мүдделі екенін айтып, ұсынылған жобалар бойынша әкімдік тиісті жұмыстарды жүргізуге әзір екенін жеткізді және кездесу барысында білім мен ғылым саласында тәжірибе алмасу мәселесі де сөз болды.