Универсиада-2025: хоккейден Қазақстан ұлттық құрамасы мерзімінен бұрын плей-оффқа жолдама алды

15.01.2025 10:43

Қазақстан құрамасы ойынды өте қарқынды бастады.

Фото: instagram.com/kazakhstanhockey

ERNUR.KZ. Қаңтардың 14-нен 15-не қараған түні хоккейшілеріміз Оңтүстік Корея спортшыларына қарсы өнер көрсетті, деп жазады stan.kz.

Қазақстан құрамасы ойынды өте қарқынды бастады. Бірінші кезеңде жігіттер қарсылас қақпасына жауапсыз үш шайба соқты. Бұл кезеңде қақпаны дәл көздеген хоккейшілер: Александр Панченко, Николай Шульга, Руслан Демин.

Екінші және үшінші кезеңде біздің құрама қос шайбадан соқты. Андрей Буяльский мен Кирилл Никитин есепті 5:0-ге жеткізді. Қақпаларына жауапсыз бес шайба жіберген Оңтүстік Корея хоккейшілері үшінші кезеңде ойындағы алғашқы және жалғыз шайбасын салды. Нысанаға дәл соққы жасаған – Дон Хен Шин. Ал отандастарымыз сапында Семен Симонов пен Денис Чапаров еншілеріне бір-бір шайбадан жазды. Осылайша қорытынды есеп 7:1. Қазақстан айқын жеңіске жетті.

Бір қызығы, отандық хоккейшілер сапынан Оңтүстік Корея қақпасына 7 түрлі хоккейшіміз шайба соқты.
Осы жеңістен соң хоккейден ерлер құрамасы Туриндегі Универсиаданың плей-офф кезеңіне жолдаманы уақытынан бұрын еншіледі.

Екі топқа бөлінген 10 команда арасынан ширек финалға 8 команда жолдама алады. Әзірге екі ойыннан кейін 6 ұпай жинаған Қазақстан құрамасы “А” тобында көш бастап тұр. Бұл топта бізден бөлек: Чехия, Оңтүстік Корея, Канада және Швеция құрамалары бар. Айта кетейік, отандық хоккейшілер алғашқы турда Швецияны 9:2 есебімен тас-талқан етіп жеңген еді. 3-турда Қазақстан – Канадаға қарсы ойнайды, ал соңғы турда Чехия құрамасымен жолығады.

Еске салайық, бұған дейін Туринде өтіп жатқан XXXII қысқы Универсиада-2025 ойындарында Қазақстан құрамасына алғашқы алтын жүлдені фристайл-могулшы Анастасия Городко сыйлаған еді.