Түркістан облысында бір жылда табысын миллиард теңгеге жеткізген зауыт бар

Бір жылда табыс көлемін миллиард теңгеге жеткізген зауыт өңір экономикасына мол үлес қосуда, - деп хабарлайды ERNUR.KZ.

Түркістан облысы Кентау қаласына қарасты Оранғай ауылдық округінде өткен жылы іске қосылған бетон зауытының табыс көлемі миллиард теңгеге жеткен. «ФахриСтрой» ЖШС бастапқыда 150 текше метр шығаруға қауқарлы болған. Ал, қазіргі таңда кәсіпорын тәулігіне 600-700 текше метрге дейін өнім өндіріп келеді. Мамандар өнім көлемінің бірнеше есеге артып кетуін, Түркістан қаласында жүргізіліп жатқан құрылыс жұмыстарымен байланыстырады. Яғни, аталған мекеме облыс орталығындағы құрылыс алаңдарына дайын өнім жеткізіп, сұраныстың 60 пайызын қамтып отыр. Серіктестікте қазір 75 азамат жұмыс істеп келеді. Жұмысшылардың басым көпшілігі Түркістан, Кентау қалаларының жергілікті тұрғындары.

Одан бөлек, аталған мекеме газоблок шығаруды да қолға алып отыр. Бұл зауыттың құрылысы қазан айында толығымен аяқталып іске қосылатын болады. Сондай-ақ, серіктестік басшылығы келесі жылы асфальт зауытын салуды да жоспарлап қойған. Егер жоспар жүзеге асырылса, тағы да жұмыс орындары ашылып, өңір экономикасының дамуына үлес қоспақ.