ТҮРКІСТАН: Жетісайда әлеуметтік қызмет сапасы жақсарған

Жетісай ауданында қоларбада отыратын мүмкіндігі шектеулі азаматтардың қоғамдық және емдік-сауықтыру орындарына еркін барып келулері үшін «Инватакси» қызметі дұрыс жолға қойылған.

Бүгінгі таңда ауданда 2 инватакси автокөлігі жолға қойылған және онда 2 диспетчерлік кезекші, 1 медициналық дәрігер мен мүмкіндігі шектеулі азаматтардың көлікке мініп-түсулеріне көмектесетін 1 көмекші 132 ересек, 12 кәмелет жасқа толмаған мүмкіндігі шектеулі жандарға қызмет көрсетеді.

Инватакси қызметіне үстіміздегі жылдың 8 айына 8 млн 600 мың теңге қаралса, әлеуметтік таксиге 11 млн 406 мың 600 теңге қаралған.

“Әлеуметтік такси қызметі аудандағы Ұлы Отан соғысының ардагерлері мен мүгедектеріне, жүріп-тұруы қиын мүгедек балаларға, бірінші, екінші топтағы мүгедектерді емдеу мекемелеріне және қоғамдық орындарға тасымалдау сынды қызметтер көрсетеді. Бұл мақсатқа бөлінген 11 млн 406 мың 600 теңге белгіленген мерзімде толық игерілді” -дейді Жетісай аудандық жұмыспен қамту және әлеуметтік бағдарламалар бөлімінің басшысы Әділхан Әбжанов.

Бөлім басшысының мәліметінше бүгінгі таңда аталмыш санаттағы азаматтарға ауданда талапқа сай 4 әлеуметтік автокөлігі, 2 диспетчерлік кезекші мен 1 медициналық дәрігер, 1 есепші 64 ересек және 52 кәмелет жасқа толмаған мүмкіндігі шектеулі азаматтарға үздіксіз қызмет көрсетіп келеді.

Жетісай ауданында 2 Ұлы Отан соғысының ардагері мен оған теңестірілген 1 азамат, 1 екінші дүниежүзілік соғыс кезінде фашистер мен олардың одақтастары құрған концлагерінің тұтқыны, 6826 мүмкіндігі шектеулі азамат есепте тұрады.