"Стресті азайтып, ұйқыны жақсартады": Ересектерге арналған емізіктер танымал бола бастады

Қытайда ересектерге арналған емізіктер (пустышкалар) танымал бола бастады. South China Morning Post басылымының жазуынша, сатып алушылар емізік сору күйзеліс пен ұйқысыздықты жеңуге, кей жағдайда тіпті темекіні тастауға көмектесетінін айтады.

Басылым мәліметінше, Қытайдағы онлайн-дүкендерде бұл өнімдердің сатылымы қарқынды түрде өсіп жатыр. Кейбір дүкендерде ай сайын 2 000 данаға дейін сатылады.

Ересектерге арналған модельдер балаларға қарағанда айтарлықтай ірі, алайда олар да мөлдір силиконнан жасалады. Қорғаныс дискілері түрлі түстермен безендірілген. Түрлі реңктерден бастап ашық түстерге дейін бар. Бағасы 10-нан 500 юаньға дейін өзгереді (шамамен 1,4-тен 70 АҚШ долларына дейін).

Өндірушілер мен сатушылардың айтуынша, бұл емізіктер күйзелісті азайтып, ұйқы сапасын жақсартады. Дұрыс тыныс алуға көмектеседі және эмоционалдық жеңілдік береді. Мұны тұтынушылардың өздері де растайды.

Жұмыстағы жағдай тым шиеленісіп кетсе, мен емізікті аламын да, өзімді қауіпсіз әрі уайымсыз балалық шағыма қайта оралғандай сезінемін, – дейді сатып алушылардың бірі.

Тағы бір ересек тұтынушы емізік оған темекіні тастауға көмектескенін айтады.

Бұл шынымен де зиянды әдеттен арылуға жәрдемдесті. Психологиялық тұрғыда жеңілдік беріп, темекіден бас тарту кезеңіндегі ашушаңдықты азайтты, – дейді ол.

Алайда дәрігерлер мұндай әдеттің денсаулыққа төндіретін қауіптеріне алаңдаулы.

Сатушылар көбіне бұл бұйымдардың ауыз қуысына келтіретін зиянын жасырады. Егер күніне үш сағаттан артық емізік сорылса, бір жыл ішінде тістердің орналасуы өзгеруі мүмкін, – деп ескертеді стоматолог Тан Цаомин.

Оның айтуынша, ұзақ уақыт емізік сору жақтың қозғалысын шектеп, шайнау кезінде ыңғайсыздық тудыруы мүмкін.

Ал психолог Чжан Мо емізікке жүгінетін ересектерде жиі қанағаттандырылмаған эмоциялық қажеттіліктер болатынын атап өтеді. Оның пікірінше, мәселенің шешімі – "балалық шаққа оралуда" емес, қиындықтармен бетпе-бет келіп, оларды жеңуде жатыр.