Үндістанда 1,5 миллиард долларлық алтын қоры табылды

ERNUR.KZ. Үндістанның Одиша штатында бірнеше ауданда алтын кеніне бай учаскелер анықталды. Болжамды қор көлемі 10–20 метрикалық тонна деп бағаланып отыр. Алайда қордың нақты көлемі туралы ресми деректерді үкіметтік ведомстволар әзірге жариялаған жоқ, деп жазады azattyq-ruhy.kz.

India Defence Service басылымының жазуынша, Одиша қазірдің өзінде Үндістандағы ең ірі тау-кен өндірісі дамыған штаттардың бірі саналады. Елдегі хромит қорының 96%-ы, бокситтің 52%-ы және темір кені қорының 33%-ы осы өңірдің үлесіне тиесілі. Бұл штатта логистика мен нормативтік-құқықтық база жақсы жолға қойылғанын көрсетеді. Соның арқасында алтын өндіру ісін басқа инфрақұрылымы әлсіз өңірлерге қарағанда жылдамырақ бастауға мүмкіндік бар.

Одиша округтерінің ресми тізіміне сәйкес, штат 30 әкімшілік ауданға бөлінген және олар үш салық округіне біріктірілген.

Мұндай бөліністің маңызы бар. Себебі Одишадағы алтынды аумақ әзірге нақты бір кен орны негізінде толыққанды өндіріс жобасы емес, барлау сатысында тұр.

Кейбір учаскелер болашақта өндіруге қолайлы болуы мүмкін, енді бір жерлерде қосымша бұрғылау қажет болады, ал кейбірі тек геологиялық тұрғыдан ғана үміт күттіретін аймақ болып қалуы ықтимал.

20 метрикалық тонна деген көрсеткіш ауқымды естілгенімен, мұнда елдік деңгейдегі жағдайды да ескеру керек. Былтыр Үндістан шамамен 700–800 метрикалық тонна алтын импорттаған. Ал 2020 жылғы мәлімет бойынша, елдің ішкі өндірісі жылына небәрі 1,6 тонна шамасында болған.

Осы салыстыру Одишадағы кен орнының маңызын нақтырақ түсінуге мүмкіндік береді. Тіпті бұл қорлар коммерциялық тұрғыдан тиімді болып шыққан күннің өзінде, олар Үндістанның жалпы алтын теңгерімін түбегейлі өзгерте алмайды.

Дегенмен мұндай кен орындары ішкі өндірісті аздап арттырып, Одиша экономикасына минералдық шикізаттың тағы бір көзін қосуы мүмкін. Сонымен қатар барлау мен пайдалы қазбаларды өндіру саласында жергілікті инфрақұрылым мен қызмет көрсету жүйесінің дамуына серпін береді.