Әйел WhatsApp арқылы қазақстандықтарды алдап, милиондаған ақша алған

11.02.2025 14:52

140

Топқа қатысушылар оның ықпалымен және жобалардың сәтті болатынына көз жеткізіп, өздерінің қаражаттарын оның және жақын оның туыстарының банктік шоттарына аударған.

Фото:depositphotos.com

ERNUR.KZ. Қазақстандық әйел WhatsApp мессенджері арқылы қаржы пирамидасын ұйымдастырған. Қылмыстық әрекеттер нәтижесінде 23 жәбірленушіге 26 миллион теңгеден астам материалдық шығын келтірілген, деп жазады tengrinews.kz.

Жоғарғы сот мәліметінше, 2020 жылдың аяғында ол WhatsApp-та "LiveStyler", "Қарлығаш", "Умножайка", "Шанс" және т.б топтарын құрған, онда ол сендіру дағдыларына ие бола отырып, адамдарды пайда табу үшін ақша салуға шақырған.

Топқа қатысушылар оның ықпалымен және жобалардың сәтті болатынына көз жеткізіп, өздерінің қаражаттарын оның және жақын оның туыстарының банктік шоттарына аударған. Ол өзі құрған схеманың табыстылығының көрінісін жасау үшін қатысушыларға жаңа қатысушылар есебінен дивидендтер түрінде алынған қаражаттың бір бөлігін төлеген. Қалғанын жеке қажеттіліктеріне жұмсаған.

"Осылайша, ақшасын көбейтемін деген уәдеге сеніп, жәбірленушілердің бірі LiveStyler тобына қосылған. Ұйымдастырушының қылмыстық ниетінен бейхабар ол 2021 жылдың қаңтар-қараша айлары аралығында алаяқ көрсеткен есепшотқа (оның өзіне, кәмелетке толмаған ұлына және оның күйеуіне тиесілі) 14 миллион теңгеге жуық ақша аударған", - делінген хабарламада.

Осы соманың 8,5 миллион теңгесін алаяқ жәбірленушіге адалдық таныту үшін қайтарып берген. Қалған 5,4 миллион теңгені ол пайдакүнемдікпен иемденген.

"Қылмыстық әрекеттер нәтижесінде 23 жәбірленушіге 26 миллион теңгеден астам материалдық шығын келтірілген. Сотталушының кінәсі жәбірленушілер мен куәлардың айғақтарымен, банк анықтамаларымен және басқа да дәлелдемелермен дәлелденді.
Сот сотталушының қылмыстық жауапкершілікке алғаш рет тартылып отырғанын, қамқорлығында кәмелетке толмаған баласы бар екенін және ауырлататын мән-жайларының жоқтығын ескере отырып, оған 4 жылға бас бостандығынан шектеу жазасын тағайындады", - делінген хабарламада.

23 жәбірленушінің пайдасына 26 милион теңге материалдық шығын өндірілді. Жазаны өтеуден қасақана жалтарған жағдайда бас бостандығын шектеу бас бостандығынан айырумен ауыстырылады.

Үкім заңды күшіне енген жоқ.