Ақтөбенің мал базарында жасөспірімдер жаппай төбелескен: 8 ұлға оқ тиіп, біреуі қаза тапты

ERNUR.KZ. Ақтөбе қаласының прокуратурасы былтыр мамырда болған сұмдық фактіні жария етті: мал базары жанында бір топ жасөспірім төбелесіп, біреуі қаза тапқан. Осы іс бойынша 10 адам тергеуге ілінген, деп жазады azattyq-ruhy.kz.

Дереккөзге сүйенсек, жасөспірімдер бір-біріне оқ атып, пышақ ала жүгірген.

«Кәмелет жасына толмаған бір бала қаза тапты. Тергеу мәліметтеріне сәйкес, марқұмды автокөлікпен қаққан. Кейін оны көп жерінен пышақтап кеткен. Осы күні облыстық полиция Департаментімен ҚК-нің 99-бабының 2-бөлігі (адам өлтіру) бойынша сотқа дейінгі тергеп-тексеру бастады», - деп хабарлайды прокуратура.

Полиция осы қылмысқа қатысы бар 10 тұлғаны ұстап, олар уақытша ұстау абақтасына қамалды. Іс 26 ақпан күні Ақтөбе облысының қылмыстық істер жөніндегі мамандандырылған ауданаралық сотына жолданғаны белгілі болып отыр.