Атышулы "Майқайыңалтын" компаниясы толығымен сатылды

ERNUR.KZ. Өткен жылдың қаңтар айында Павлодар облысы Баянауыл ауданындағы алтын кенішінде 4 бірдей құтқарушы қызмет барысында опырылып түскен шұңқырға құлап кеткен болатын, деп жазады inbusiness.kz.

Қайғылы жағдай орын алған тұста көпшілік аталмыш алтын кенішінің бірінші басшыларын жауапқа тарту керек деген пікірді әлеуметтік желі арқылы жиі білдіріп жатты.

Кейін белгілі болғандай, "Майқайыңалтын" кәсіпорны "Rense Enterprises Limited" компаниясына қарасты болған. Ал оның құрылтайшыларының "тамыры" шетелге шығарады.

Таяуда осы ірі алтын кенішін отандық "АК Алтыналмас" АҚ сатып алды. Сөйтіп, жарғылық капиталдағы 100% үлесті сатып алуға қатысты келіссөздер сәтті аяқталды. Ендігі ретте "Майқайыңалтын" АҚ жаңа басшылығы өндірісті жаңғыртып, өнімділік пен жұмыс қауіпсіздігін арттыруға бағытталған инновациялық технологияларды енгізуге бейілді. "Алтыналмас" үшін де мұндай сауда-сатты тиімді болып отыр.

Себебі сол арқылы нарықтағы орнын одан әрі бекіте түседі. Аталмыш ірі компания елімізде алтын өндірісі бойынша үздік үштікке енеді әрі геологиялық барлаудан бастап бағалы металлды шығаруға дейінгі барлық өндірістік циклді жүзеге асырады.

Еске сала кетсек, арнайы құрылған комиссия 2024 жылы 4 адамның өмірін жалмаған жағдайға толығымен "Майқайыңалтын" компаниясы басшылығы кінәлі деген байламға келген болатын.

Сол тұстағы кәсіпорын басшылығына қатысты тергеу амалдары әлі де жүргізіліп жатыр. Оларға абайсызда екі немесе одан да көп адамның өліміне әкелген тау немесе құрылыс жұмыстарын жүргізу кезіндегі қауіпсіздік ережелерін сақтамағаны үшін айып тағылып отыр. Алайда кәсіпорын басшылығы бірнеше рет арнайы тексеріс нәтижесімен келіспейтіндерін білдірген.

Ал осыдан бір айдан астам уақыт бұрын 2016 жылы жүргізілген тексеріс барысында алтын кенішіндегі олқылықтарға көз жұма қарағаны, соның салдарынан қайғылы жағдай орын алғаны үшін Екібастұздағы өндірістік қауіпсіздік жөніндегі мемлекеттік бақылау мекемесінің бұрынғы басшысы мен сол мекеменің бұрынғы бас маманы сот алдында жауапқа тартылды. Экс-шенеуніктің бас бостандығы 3 жылға, бас маманның бас бостандығы 2 жылға шектелді.