Ауылдардағы дарынды оқушыны олимпиадаға дайындайтын онлайн мектеп ашылды

04.03.2025 12:53

620

2024 жылы қазақстандық оқушылар 35 халықаралық олимпиада мен конкурстарға қатысып, 563 медаль жеңіп алды.

Фото: freepik

ERNUR.KZ. Ауыл мектебінің оқушыларын зияткерлік олимпиадалар мен байқауларға дайындау мақсатында «Дарын» онлайн мектебі өз жұмысын бастады. Бұл туралы «Дарын» республикалық ғылыми-практикалық орталығының директоры Гаждембек Тұрсынов айтты, деп жазады inform.kz.

"ҚР Оқу-ағарту министрлігінің бастамасымен екінші жыл қатарынан Ауыл мектептерінің оқушыларына арналған республикалық пәндік олимпиада өткізіліп келеді. Ол Қазақстанның шалғай елді мекендеріндегі дарынды және талантты балалардың қабілеттерін анықтауға және дамытуға бағытталған. 2024 жылы мектепішілік кезеңге 113 мыңнан астам бала тіркелді, бұл 2023 жылға қарағанда бала санының 35 мыңға көбейгенін көрсетеді. Нәтижесінде ауылдық оқушылардың жүлделі орындарға ие болу көрсеткіші 10 есеге жуық артып, мыңдаған ауыл балалары үшін жаңа мүмкіндіктерге жол ашты", — деді ол ОКҚ алаңында.

Сондай-ақ спикер шалғай ауылдардағы дарынды балаларды олимпиадаларға дайындаудың жаңа тәсілі қолға алынғанын атап өтті.

"Ауыл мектебінің оқушыларын зияткерлік олимпиадалар мен байқауларға дайындау мақсатында «Дарын» онлайн мектебі өз жұмысын бастады. Қазіргі таңда оған II Республикалық ауыл олимпиадасының мыңға жуық финалисті сырттай қабылданып, білімін жетілдіруде", — деді Гаждембек Тұрсынов.

Еске сала кетсек, 2024 жылы қазақстандық оқушылар 35 халықаралық олимпиада мен конкурстарға қатысып, 563 медаль жеңіп алды. Оның 77-сі — алтын, 201-і — күміс, 285-і — қола медаль, яғни әр екінші қатысушы жүлдегер атанған.