"Белгілері бар көлік мінбейді": Алматылық полицейлер енді жүргізушілерді жасырын бақылайды

Фото: Ru.freepik.com

ERNUR.KZ. Енді патрульдік полиция қызметкерлері азаматтық киімде, арнайы белгілері жоқ автокөліктермен жүргізушілерді жасырып бақылайды, деп жазады stan.kz.

Мұндағы мақсат – жол қозғалысы ережелерін өрескел бұзғандарды анықтау, әсіресе агрессивті жүргізушілерді әшкерелеу. Олардың қатарында қарсы жолаққа шығатындар, "шахмат" тәсілімен жүретіндер, басқа көліктерді қысып өтіп, апаттық жағдайлар туғызатындар да бар.

Аталған құқық бұзушылықтарды тіркей отырып, жасырын патрульдер ақпаратты нақты уақыт режимінде жақын маңдағы патрульдік полиция экипаждарына жолдайды. Кейін сол экипаждар көлікті тоқтатып, жүргізушіні заңнамада белгіленген тәртіппен жауапкершілікке тартады.

Бұл тәжірибе өз тиімділігін көрсетті. Өткен демалыс күндері осы тәсілмен Алматыда 28 агрессивті жүргізу дерегі анықталып, олардың жолы кесілді. Барлық құқық бұзушы жауапкершілікке тартылды.

“Жасырын патрульдеуді енгізу жүргізушілердің тәртібін арттыруға және жол-көлік оқиғаларының алдын алуға, әсіресе қауіпті жүргізу мәнерінен туындайтын апаттардың санын азайту үшін енгізілді”, – деп мәлімдеді полиция департаменті әкімшілік полиция басқармасының бастығы Әбдінұр Тасыбаев.

Оның сөзінше, жасырын патрульдеу – көзге бірден түсе бермейтін өрескел құқық бұзушылықтарды анықтаудың тиімді құрл. Полиция қызметкерлері жалпы көлік ағынында жүріп, жүргізушілердің нақты мінез-құлқын бақылайды. Жол қозғалысы ережесін бұзылса, бұл жедел жақын маңдағы экипаждарға жеткізіліп, тиісті шаралар қабылданады.

Ведомство өкілі олардың міндеті тек жауапкершілікке тарту ғана емес, қауіпсіз жүргізу мәдениетін қалыптастыру екенін атап өтті.