"Дөңгелегі өртенген": Қостанай-Астана бағытындағы Qazaq Air ұшағы ақауға байланысты әуежайға қайтарылды

Фото: flyqazaq.com
ERNUR.KZ. Қостанай-Астана бағытындағы QazaqAir әуе компаниясының жолаушы ұшағы техникалық ақауға байланысты Қостанай әуежайына қайта оралды, деп жазады Stan.kz.

Ұшақ бортында ресейлік Ura.ru басылымының тілшісі де болған. Журналистің айтуынша, Қостанай әуежайында ұшақ көтерілмек болған сәтте оның дөңгелегі өртене бастаған.

“Ұшақ көтерілмек болып қозғалып, кенет тоқтай бастады. Мен дәл осы дөңгелектің жанында отырдым, тоқтау кезінде жалын шығып, дөңгелек өртене бастады”, – деп жазды ресейлік журналист.

Әуе компанияның баспасөз қызметі де жағдайға қатысты мәлімдеме жасады.

“Ұшақта техникалық ақау анықталды, сол себепті ұшу процесі тоқтатылды. Кейбір жолаушылар дөңгелек бөлігі аумағында қысқа жарық шамдарын байқағанын атап өтті, бұл техникалық тексеріс барысында ескеріледі. Әуе компаниясының техникалық тобы ақауды тексеру және жою үшін Қостанай әуежайына жіберілді”, – делінген хабарламада.

Компания жолаушыларға қонақүйде орналастыру, билет ақшасының толық қайтарымы немесе басқа рейске айырбастау мүмкіндігі ұсынылғанын атап өтті.