Қазақстанда төтенше жағдай кезінде бұғатталмайтын сайттардың тізімі жасалады

Бағдат Мусин министрлік Мемлекеттік техникалық қызметпен бірлесе отырып, еш жағдайда бұғатталмайтын интернет-ресурстардың тізімін жасап жатқанын айтты.

"Қаңтар оқиғасы бізге төтенше жағдай кезінде мемлекет барлық байланыс желісінің жұмысын тоқтатпау керек екенін көрсетті. Бірқатар өмірлік маңызы бар нысандар, банктер, электронды үкімет сияқты мемлекеттік және жеке ұйымдар кез келген уақытта үздіксіз қолжетімді болуы керек. Сондықтан біз "Ақ тізім" деп аталатын осындай құқықтық актіні, кез келген уақытта, тіпті төтенше жағдайлар кезінде де қолжетімді болатын интернет-ресурстардың тізімін жасап жатырмыз", - дейді Бағдат Мусин.

Сонымен қатар Цифрлық даму, инновациялар және аэроғарыш өнеркәсібі министрлігі "алаяқтардың" телефон нөмірлерін пайдалана отырып, интернет-алаяқтықпен күресу шараларын қабылдап жатыр. Мұндай нөмірлер халықаралық трафикті өңдеу арқылы бақыланады және бұғатталады.

Сонымен қатар министр Ақпараттық байланыс құралдарын қолданудың өсуі ақпараттық қауіпсіздіктің маңызын арттыратынын айтты. "Қазақстанның киберқалқаны" тұжырымдамасы аясында нормативтік-құқықтық база қалыптасты. Электрондық үкімет объектілері мен маңызды ақпараттандыру объектілерін қорғау талабы белгіленді.