21 наурызда Алматыда жол апаты болды: әл-Фараби даңғылы мен Меңдіқұлов көшесінің қиылысында Mercedes пен Zeekr автокөліктері соқтығысты.
фото: Ақорда
ERNUR.KZ. Ішкі істер министрі Ержан Сәденов Алматыдағы Әл-Фараби даңғылында болған жол апатына қатысты мәлімдеме жасады, деп жазады tengrinews.kz.
Бұл туралы ол әлеуметтік желідегі парақшасында бөлісті. Сәденовтің айтуынша, ІМ даулы апаттың мән-жайын жан-жақты әрі объектив тергеу үшін және барлық кінәлінің жазадан құтылып кетпеуі үшін шаралар қабылдап жатыр.
"Апат дерегі бойынша қылмыстық іс қозғалды. Zeekr автокөлігінің күдікті жүргізушісі сот шешімімен қамауға алынды. Жол-көлік оқиғасы кезінде ол мас болғаны анықталды. Сонымен қатар, бұрынғы полиция қызметкерінің әрекетсіздігі және мемлекеттік нөмірлік белгілердің заңсыз берілуі деректері бойынша да қылмыстық істер қозғалды. Тергеуді ІІМ-нің Өзіндік қауіпсіздік департаменті жүргізіп жатыр. Қоғамда таралған барлық мәлімет тексеріліп жатыр", - деді ІІМ басшысы.
Жағдайды объектив бағалау үшін Алматыға ІІМ комиссиясы - Өзіндік қауіпсіздік департаменті, Әкімшілік полиция комитеті және Жеке құраммен жұмыс департаменті жіберілді.
"Жедел-қызметтік жұмыстағы олқылықтары үшін Алматы қалалық полиция департаменті бастығының орынбасары, сондай-ақ, әкімшілік полиция және қоғамдық қауіпсіздік басқармаларының басшылары қызметінен босатылды. Қазір қызметтік тәртіпті нығайту және өз қатарларымызда заңдылықты қамтамасыз ету бойынша қосымша шаралар қабылданып жатыр", - деді Сәденов.
Сонымен қатар, қалаға басқа өңірлерден күшейтілген полиция жасақтары жіберілді. Ауқымды пысықтау және рейдтік іс-шаралар жүргізіліп жатыр. Іс-шаралардың алғашқы күндерінде жол қозғалысы ережелерін бұзудың 4,8 мыңнан аса дерегі анықталды, оның ішінде мас күйде көлік басқару, қарсы жолаққа шығу, жалған нөмірлерді пайдалану және құқықсыз көлік айдау деректері бар. Айыппұл тұрағына 2 мыңнан аса көлік қойылды.
Мұндай күшейтілген тексерістер бүкіл ел бойынша жүргізіліп жатыр.
"Тергеу барысы менің жеке бақылауымда. Барлық кінәлілер заңға сәйкес қатаң жауапқа тартылады. Мәртебесіне, лауазымына және байланыстарына қарамастан ешкім жазадан құтылмайды. Заң алдында бәрі тең. Заң мен тәртіп - қоғамдағы қауіпсіздік пен әділдіктің негізі", - деп толықтырды Ержан Сәденов.
Алматыдағы әл-Фараби даңғылында болған апат
21 наурызда Алматыда жол апаты болды: әл-Фараби даңғылы мен Меңдіқұлов көшесінің қиылысында Mercedes пен Zeekr автокөліктері соқтығысты. Салдарынан үш адам қаза тапты. Mercedes-тің 29 жастағы жүргізушісі мен 20 және 22 жастағы екі жолаушы бойжеткен оқиға орнында көз жұмды. Zeekr жүргізушісі аман қалып, түрлі жарақаттармен ауруханаға жатқызылды. Апат кезінде ол мас болған.
Бұдан бөлек, мемлекеттік нөмірлерді заңсыз беру мүмкіндігі туралы уәждер бойынша өзіндік қауіпсіздік департаменті қылмыстық іс қозғады, бірқатар лауазымды тұлға қызметінен айырылды.
