Көші-қон заңнамасын жетілдіру жөніндегі жастар идеатоны өтті

Президенті жанындағы Адам құқықтары жөніндегі комиссия Халықаралық көші-қон ұйымымен (ХКҰ), Президент жанындағы Мемлекеттік басқару академиясымен, Еңбек және халықты әлеуметтік қорғау министрлігімен және Назарбаев Университетімен бірлесіп «Қазақстан Республикасындағы көші-қон заңнамасын және құқық қолдану практикасын жетілдіру жөніндегі жастар идеатоны («Youth IDEAthon»)» іс-шарасын өткізді.

Бұл іс-шара Швейцарияның даму және ынтымақтастық агенттігінің (SDC) қолдауымен өткізілді.

Іс-шараға қатысушылар алдында ХКҰ Орталық Азия бойынша миссиясының Субөңірлік үйлестірушісі Зейнал Гаджиев мырза, Президент жанындағы Адам құқықтары жөніндегі комиссия төрағасының орынбасары Тастемір Әбішев, Президент жанындағы Мемлекеттік басқару академиясының вице-ректоры Әлия Масалимова құттықтау сөз сөйледі.

ХКҰ-ның Орталық Азиядағы миссиясының басшысы Зейнал Гаджиев мырза өз сөзінде жас ұрпақтың проблемаларды шығармашылықпен шешудегі және көші-қонға байланысты мәселелерді шешуге белсенді қатысудағы басты маңызын атап өтті.

Комиссия төрағасының орынбасары Тастемір Әбішев көші-қон саясаты Қазақстан Республикасы мемлекеттік саясатының стратегиялық бағыттарының бірі болып табылатынын және мыналарға бағдарланғанын атап өтті:

сыртқы көші-қон саласында – этникалық репатриацияны ынталандыруға (қандастарды) және жоғары білікті еңбекші-мигранттарды тартуға;

ішкі көші-қон саласында – экономиканың қажеттіліктеріне сәйкес және олардағы демографиялық жағдайды ескере отырып, халықты солтүстік өңірлер бойынша қоныстандыру проблемаларын шешуге.

Бұдан әрі Комиссия төрағасының орынбасары мемлекеттік органдардың қызметінде еңбекші-мигранттардың құқықтарын қорғау мәселелерін өзектендіру, еңбекші-мигранттардың құқықтарын қорғауда азаматтық қоғам институттары мен жоғары оқу орындарының әлеуетін толық пайдалану, халықты, оның ішінде көшіп-қонушыларды құқықтық ағартудың рөліне ерекше назар аудару қажеттігін атап өтті.

Сондай-ақ Комиссия төрағасының орынбасары Қазақстан Президенті Қ.Тоқаев заңның үстемдігіне және қазақстандық қоғамда құқықтық мәдениетті орнатуға, Қазақстан Республикасының халықаралық міндеттемелері аясында әркімнің конституциялық құқықтарын сақтауға маңызды мән беретінін ерекше атап өтті.

Өз сөзінің соңында Т.Әбішев жастар мен олардың ұйымдарын көші-қон заңнамасы мен құқық қолдану практикасын жетілдіру бойынша жаңа идеялар мен жобалар жасауға, Көші-қон саясатының 2023-2027 жылдарға арналған тұжырымдамасын іске асыруға белсенді атсалысуға шақырды.

Қатысушылар командаларға бөлініп, өздерінің күш-жігерін мазмұнды презентацияларды ұсынуға және болашақта мүмкін болатын іске асыру үшін инновациялық идеялардың тұжырымдамаларын жасауға арнады. Басты мақсат ынтымақтастықты нығайтуға және Қазақстан шегінде де, халықаралық аренада да көші-қон тәжірибесін түсінуді тереңдетуге ықпал ететін стратегияларды зерделеу болды. Мигранттардың шыққан және баратын елдерінде тұруына жәрдемдесудегі үкіметтік және үкіметтік емес ұйымдардың аса маңызды рөліне ерекше назар аударылды.

Таныстырылымдар Қауіпсіз, реттелген және тұрақты көші-қон туралы жаһандық шартта көрсетілген мақсаттармен келісілді. Қатысушылар аудиториямен резонанс тудырған идеяларды ұсына отырып, пікірталастарға белсенді қатысты. Еңбек нарығының серпінді қажеттіліктері, мәдени мұраны сақтау, технологиялық салдарлар және қызметкерлер мен жұмыс берушілер арасындағы оң қарым-қатынастарды қалыптастыру, халықаралық стандарттарға сәйкес еңбекші-мигранттардың құқықтары мен бостандықтарын қамтамасыз ету сияқты тақырыптар қозғалды.

Жалпы, болып өткен «Жастар идеатоны» жас ұрпаққа көші-қон және оның көп қырлы салдары туралы жалғасып жатқан диалогқа елеулі үлес қосуға мүмкіндік беретін негізгі платформа болды.