​Ресейден электр энергиясын импорттау жалғасады

- Келісімнің мақсаты – энергетикалық жүйелердің қатар жұмыс істеуі процесінде пайда болатын тараптар арасындағы қарым-қатынастарды рәсімдеу, сондай-ақ олардың өзара іс-қимылының негізгі шарттарын айқындау, - деді сенатор Сүйіндік Алдашев.

Оның айтуынша, Қазақстан мен Ресейдің бірыңғай энергетикалық жүйелерінің қатар жұмысын қамтамасыз ету мақсатында тараптар төмендегідей шараларды қабылдайды:

1) Ресей Федерациясынан Қазақстанның бірыңғай энергетикалық жүйесіне беруге жоспарланған электр энергиясының көлемдерін жыл сайын келісу;

2) Электр энергиясын сатып алу мен сату құнын «KEGOC» акционерлік қоғамы мен Ресейдің «Интер РАО БЭЖ» компаниясы арасында жасалған келісімдер бойынша электр энергиясының рұқсат етілген нақты мемлекетаралық сальдо ағындары шегінде де, одан асырылған көлемде де айқындау;

3) Қазақстанның энергия өндіруші ұйымдары жаппайтын электр энергиясын тұтынудың жоспарлы көлемін жабу үшін Ресейден Қазақстан Республикасына берілетін электр энергиясын сатып алуды коммерциялық негізде жүзеге асыру.

- Құжат аясында Қазақстанның электр энергиясын бірыңғай сатып алушысы ретінде «Жаңартылатын энергия көздерін қолдау жөніндегі қаржы-есеп айырысу орталығы» ЖШС анықталған. Айта кететін жәйт, 2024 жылдың қорытындысы бойынша елімізде электр энергиясын тұтыну көлемі өндіру көрсеткіштерінен асып түсті. Нақты айтқанда, электр энергиясының өндірісі 117,9 млрд кВтс, бұл ретте тұтыну – 119,9 млрд кВтс құрады. Былтыр Ресейден электр энергиясын импорттау көлемі 3,1 млрд кВтс болды. Уәкілетті органның болжамына сәйкес, 2025 жылы электр энергиясына тапшылық 5,7 млрд кВтс құрайды, бұл 2024 жылғы көрсеткіштен 46 пайызға артық. Электр энергиясының тапшылығы әсіресе тұтынудың шарықтау сағаттарында, яғни кешкі уақытта сезіледі. Мұндай жағдайда Бірыңғай сатып алушы Ресей Федерациясының энергия жүйесінен жеткізілімдерді жүзеге асырады, - деді депутат.

Оның сөзіне қарағанда, келісімге сәйкес, Ресейдің энергетикалық жүйесі Қазақстанның біртұтас энергетикалық жүйесінде жиілік пен кернеуді рұқсат етілген шектерде қолдайды, сонымен қатар Қазақстанның бірыңғай энергетикалық жүйесіндегі өндіріс пен тұтыну арасындағы сағаттық ауытқуларды өтейді. Келісімді ратификациялау Қазақстан мен Ресейдің бірыңғай энергетикалық жүйелерінің қатар жұмысын қамтамасыз етіп, электр энергетикасы саласындағы одан әрі тиімді ынтымақтастықты кеңейтуге, сондай-ақ Қазақстанның бірыңғай энергетикалық жүйелеріндегі реттеуші қуат тапшылығын азайтуға мүмкіндік береді.

Бұдан бұрын хабарланғандай, Энергетика министрі Алмасадам Сәтқалиев көрші елдерден лектр энергиясын сатып алуға қатысты түсінік берді.