​Сайран көлінің жағалауына скейтпарк салынады

0
149

Жоба аясында ұзындығы 2,5 шақырым болатын серуен жолын, жағажай аймағын, балалар мен спорт алаңдарын, велосипед және скейтпарктерді салу көзделген.


​Сайран көлінің жағалауына скейтпарк салынады
Фото: Алматы әкімдігі

ERNUR.KZ. Қала әкімі Дархан Сатыбалды Сайран су қоймасы аймағын көркейту жұмыстарының барысымен танысты, деп жазады inform.kz.

Алматы әкімдігінен мәлім еткендей, жоба аясында ұзындығы 2,5 шақырым болатын серуен жолын, жағажай аймағын, балалар мен спорт алаңдарын, велосипед және скейтпарктерді салу көзделген. Сонымен қатар санитарлық аймақтар, полиция мен құтқару бекеттері де қарастырылған.

Қала басшысына өзінің тапсырмасымен жүргізілген қала кеңістігін қолжетімді етуге бағытталған жұмыстар туралы баяндалды. Атап айтқанда, Төле би көшесі бойында жағалаудан тротуарға шығатын өткел жасалған, ал Абай көшесі жағынан пандус орнатылған. Жұбанов көшесінің ең тік бөлігінде мүмкіндігі шектеулі азаматтарға арналған жедел саты салу жоспарланып отыр. Бұған қоса, Варламов көшесі жағынан жасыл желекке зиян келтірмей, балалар арбасына арналған асфальт жол төселіп жатыр.

– Егер біз жаңа бір жобаны іске асырып жатсақ, оны бірден 10-20 жылға лайықтап жасауымыз керек. Әйтпесе, біраз уақыттан кейін қайтадан жөндеуге тура келеді. Бұл жерде қала тұрғындары мен қонақтары үшін өзіне тән ерекше атмосфера қалыптасуы шарт. Егер Сайранды жаңғыртып, көркейтуге кіріссек, ол заманауи талаптарға сай болуы керек, - деді қала әкімі.

Жұмыс барысында қосымша инженерлік және ландшафтық шешімдер қабылдау қажеттігі туындаған. Бұл жобаның сапасын арттырады, бірақ құрылыс мерзімін сәл ұзартады.

Осыған дейін Сайран көлінің жағалауын абаттандыру жұмыстары 90 пайызға орындалғаны туралы жазғанбыз.

Еске салайық, осыған дейін Алматының бұрынғы әкімі Ерболат Досаев Сайран көлінің жағалауын абаттандыру жұмыстары мамырда аяқталатынын айтқан.