Жаңаөзендегі жарылыс: науқастардың жағдайы айтылды

ERNUR.KZ. Жаңаөзенде жарылыстан кейін үйінділер астында ұзақ уақыт жаншылып қалған науқас Ақтаудағы ауруханаға жеткізілді. Бұл туралы Жаңаөзеннің көпбейінді аурухана директоры Серік Асқаров айтты, деп жазады tengrinews.kz.

Облыстық аурухананың жансақтау бөлімінде жарылыс кезінде денесінің 70 пайызын күйік шалған науқас та бар. Дәрігерлер екеуіне де қолдан келетін көмекті көрсетіп жатқандарын айтты.

Ал денесін күйік шалып, омыртқасы сынған 23 жастағы әйелдің денсаулығы жақсарып келеді. Медицина қызметкерлерінің айтуынша, оған бұдан былай жасанды тыныс құрылғысы қажет емес, қазір ол өз бетінше тыныс алады. Сонымен қатар, дәрігерлердің сұрақтарына да жауап берді. Ал жансақтау бөлімінде жатқан тағы бір науқастың жағдайы әзірге ауыр.

Жарылыстан зардап шеккен екі қыз бала мен бір ер адамның жағдайы тұрақталды. Оқушы қыздарға психолог маман көмек көрсетті.

Еске салайық, 17 сәуірде Жаңаөзендегі үйлердің бірінде жарылыс болды. Одан кейін екі қабатты тұрғын үйдің кіреберісі опырылған. Төрт адам қаза болды.