Құжат "Ашық НҚА" порталында пайда болды.
Фото: gov.kz
ERNUR.KZ. Оқу-ағарту министрлігі жекеменшік білім беру ұйымдарын қаржыландыру тәртібіне өзгерістер әзірледі, деп жазады inbusiness.kz.
Ведомство "Жекеменшік білім беру ұйымдарында орта білім беруге мемлекеттік білім беру тапсырысын, оқуға ата-ана төлемақысының шекті мөлшерін бекіту туралы" ҚР Білім және ғылым министрінің 2020 жылғы 22 қаңтардағы № 29 бұйрығына түзетулер әзірледі.
Бұйрық жобасы мемлекеттік білім беру тапсырысын алатын жекеменшік орта білім беру ұйымдары үшін қаржыландырудың белгіленген мөлшерін белгілеуді көздейді.
"Жобаның негізгі мақсаты – ата-аналар үшін оқу құнының тұрақтылығын қамтамасыз ету және айлық есептік көрсеткіштің (АЕК) өзгеруіне байланысты кейінгі жылдары оның автоматты түрде ұлғаюына жол бермеу. Ұсынылған тәсіл білім берудің қолжетімділігін арттыруға, оқыту құнын қалыптастырудың ашықтығы мен болжамдылығын қамтамасыз етуге, есептік көрсеткіштердің жыл сайынғы өзгеруінің әсерін азайтуға және мемлекеттік білім беру тапсырысын іске асыратын жекеменшік орта білім беру ұйымдарында білім алу үшін неғұрлым тұрақты жағдайлар жасауға мүмкіндік береді", – делінген құжат жобасында.
Белгілі болғандай, өзгерістерді қабылдау мемлекеттік білім беру тапсырысын алатын жеке орта білім беру ұйымдары үшін қаржыландырудың шекті мөлшерін белгілеу қажеттілігіне негізделеді.
"Жоба қаржыландырудың тұрақты мөлшерін бекітуге, айлық есептік көрсеткішті жыл сайын қайта қарау кезінде оның автоматты өзгеруін болдырмауға, норманы іске асыру кезінде құқықтық айқындылықты қамтамасыз етуге бағытталған", – делінген бұйрық жобасында.
Жобаны жария талқылау 15 қыркүйекке дейін жалғасады.
