Берекелі отбасы – бірліктің бастауы

Қазақстан халқы Ассамблеясының 30 жылдық мерейтойы еліміздің барлық өңірлерінде кең көлемде аталып өтуде. Бұл айтулы дата – Қазақстан халқының ынтымағы мен татулығының, достығы мен өзара сыйластығының айғағы. Осы мерейлі жыл аясында Шымкент қаласындағы «Достық үйінде» «Отбасы күні» мерекесіне арналған салтанатты іс-шара ұйымдастырылып, қоғам өмірінде өнегелі ісімен үлгі болып жүрген отбасылар марапатталды.

Мерекелік жиынның ашылуында қалалық Қазақстан халқы Ассамблеясы жанындағы Аналар кеңесінің төрайымы Гүлжан Сүгірбаева мен Ассамблея хатшылығының меңгерушісі Айгүл Әмзеева құттықтау сөз сөйлеп, отбасы құндылықтарының маңыздылығына тоқталды.

– Отбасы – мемлекет пен қоғамның ең басты тірегі, рухани тіреуі. Әр шаңырақта сүйіспеншілік, түсіністік және өзара құрмет орнаса, елдің бірлігі мен ынтымағы да арта түседі. Әрбір әулеттің тарихы – ұлт тарихының ажырамас бөлігі. Сол себепті біз өнегелі отбасыларды дәріптеу арқылы жастарға бағыт-бағдар беруді, ұлттық құндылықтарды ұлықтауды көздейміз. Ұрпақ тәрбиесі – тек аналардың емес, барша қоғамның қасиетті борышы. Бүгінгі марапаттар – осы бағыттағы еңбектің айғағы, – деді Гүлжан Сүгірбаева өз сөзінде.

Іс-шара барысында қатысушыларға арналған концерттік бағдарлама ұсынылып, отбасылық құндылықтар мен бірлік, татулық тақырыбында арнайы бейнероликтер көрсетілді. Мектеп оқушылары мен жастар шығармашылық топтары өз өнерлерін ортаға салып, отбасы мен қоғам арасындағы рухани байланыс туралы жүрекжарды өлеңдер оқыды.

Шараның негізгі бөлігінде алдын ала іріктелген өнегелі отбасылар түрлі номинациялар бойынша марапатталды. Олар қала өміріне белсене араласып, өз еңбегімен жастарға үлгі болып жүрген азаматтар.

«Азамат тәрбиелеген отбасы» номинациясы бойынша марапатқа ие болған Курбанходжаевтар әулеті – қоғамға адал қызмет етіп, ұрпақ тәрбиесіне ерекше мән беріп келе жатқан өнегелі жанұя. Бұл әулеттен шыққан таеквондошы Дастан Нәжімханов – ел намысын асқақтатып жүрген жас спортшы. Оның жетістігі – ата-анасының дұрыс тәрбие мен еңбекқорлыққа баулу ісінің нәтижесі.

«Күміс кереге» номинациясы Бүркіттер және Андар отбасыларына табысталды. Екі отбасы да ширек ғасырдан астам уақыт бойы тату-тәтті өмір сүріп, ұлттық құндылықтарды насихаттап келеді. Олар тек өз шаңырақтарының ғана емес, айналасындағылардың да сый-құрметіне бөленген. Отбасылық береке мен тұрақтылық – олардың өмірлік ұстанымы.

«Алтын шаңырақ» номинациясының иегері атанған Үсенбековтер отбасы – ел арасында үлкен абыройға ие, жарты ғасырдан астам уақыт бойы бір шаңырақ астында тату-тәтті ғұмыр кешіп келе жатқан өнегелі жұп. Олардың өмір жолы мен ұстанымдары жастар үшін үлгі, ал ұрпақтары – білім мен еңбектің, мейірім мен жауапкершіліктің арқасында ел дамуына өз үлесін қосып жүрген азаматтар.

Марапат иелеріне ұйымдастырушылар тарапынан Алғыс хаттар мен естелік сыйлықтар табыс етілді. Әр отбасы мүшесі өз әсерімен бөлісіп, отбасының қоғамдағы орны мен жауапкершілігі жөнінде жүрекжарды пікірлерін білдірді.

– Біздің мақсатымыз – отбасылардың қоғамдағы рөлін арттыру, ұлттық және адамгершілік құндылықтарды дәріптеу. Әр отбасы елге үлгі болатындай өмір салтын қалыптастырса, мемлекетіміздің болашағы жарқын болмақ. Себебі мықты мемлекет – мықты отбасылардан құралады, – деді іс-шараны қорытындылаған Айгүл Әмзеева.

Бұл күні «Достық үйінің» кең залы әсем безендіріліп, мерекелік көңіл-күйге толы болды. Қатысушыларға отбасылық фотокөрме ұйымдастырылып, онда Шымкент қаласының әртүрлі ұлт өкілдерінің өмірінен сыр шертетін суреттер қойылды. Бұл көрме көпшілікке ел ішіндегі этностардың татулығы мен өзара сыйластығын тағы бір мәрте көрсетті.

Іс-шара соңында қатысушылар «Отбасы – қоғамның тірегі» атты ұранмен естелік суретке түсіп, өзара жылы лебіздері мен тілектерін білдірді.

Отбасы – адам өміріндегі ең киелі ұғым. Себебі дәл осы ұядан адамгершілік пен имандылық, сүйіспеншілік пен мейірім, жауапкершілік пен еңбексүйгіштік қасиеттердің бәрі бастау алады. Өнегелі отбасының басты байлығы – татулық пен түсіністік. Осындай берекелі әулеттердің көбеюі – елдің іргесінің нығаюының кепілі.

Мерекелік жиын бірлік пен татулықты дәріптеу, отбасылық құндылықтарды сақтау және қоғамның рухани негізін күшейту бағытында ерекше мәнге ие шара ретінде есте қалды. Ассамблея мүшелері мен қатысушылардың пікірінше, мұндай іс-шаралар жастарды ізгілікке, жауапкершілікке, өз отбасына құрметпен қарауға тәрбиелейді.