Шымкент спортшыларының үлесі зор – Мақсат Әбдікерімов 2 күміс, Жәнібек Құлмырзаев 1 қола және командалық сында 1 алтын, 1 күміс медаль жеңіп алды.
Қазақстан құрамасы садақ атудан өткен Әлем кубогында айтулы және тарихи жетістікке қол жеткізді. Жалпыкомандалық есепте 2 900 ұпай жинаған біздің спортшылар, 32 елдің ішінен озып шығып, бірінші орынды иеленді. Бұл – еліміздің спорт тарихындағы маңызды жеңіс және қазақ спортының әлемдік аренадағы әлеуетін дәлелдейтін оқиға.
Бұл қуанышты жаңалық туралы бүгін Шымкент қаласы әкімдігінің ресми өкілі, қала әкімінің орынбасары – Сәрсен Абайұлы Құранбек қатысқан брифингте жарияланды.
Қазақстан құрамасы Әлем кубогында барлығы 9 медаль (2 алтын, 4 күміс, 3 қола) жеңіп алып, командалық есептегі көшбасшылықты бекітті. Бұл жетістік спортшылардың жоғары шеберлігін, ұжымдық рухын және тынымсыз дайындығын көрсетеді.
Мажар нысанасы (90 метр) бойынша өткен командалық сында қазақстандық мергендер қарсыластарынан басым түсіп, алтын медальді жеңіп алды. Бұл командалық жеңістің жарқын жұлдыздары – Мақсат Әбдікерімов пен Жәнібек Құлмырзаев. Командалық алтын – Қазақстан құрамасы үшін Әлем кубогындағы ең жоғары марапаттардың бірі болды.
Командалық сындардан бөлек, қазақстандық спортшылар жекелей сайыстарда да өте жоғары нәтижелер көрсетті:
- Пута нысанасы (70 м) бойынша жекелей сайыс:
- Мақсат Әбдікерімов – керемет өнері үшін күміс жүлдегер атанды.
- Жәнібек Құлмырзаев – үздік үштікті түйіндеп, қола медальді иеленді.
- Пута нысанасы (70 м) бойынша командалық жарыс:
- Бұл сында да біздің құрама командалық рухын көрсетіп, тағы бір күміс медальді еншіледі.
- Жамбы нысанасы (30 м) бойынша ерлер арасындағы сайыс:
- Мақсат Әбдікерімов жекелей сында тағы да шеберлігін дәлелдеп, күміс жүлдеге қол жеткізді.
Жалпы командалық жетістікке жетуде Шымкент қаласының спортшылары Мақсат Әбдікерімов пен Жәнібек Құлмырзаевтың үлесі ерекше зор. Олар бірнеше нысана бойынша өнер көрсетіп, құрама қоржынына қомақты медальдар қосты:
- Мақсат Әбдікерімов: 2 күміс (жекелей) және командалық сында 1 алтын, 1 күміс медаль иеленді.
- Жәнібек Құлмырзаев: 1 қола (жекелей) және командалық сында 1 алтын, 1 күміс медаль жеңіп алды.
